منتدى الخليج - البارحه جالس وادير التفاكير

البارحـة جالـس وأديـر التفاكيـر
مانيب داري وش بقي مـن حياتـي
ما اقول غير الله يصـون المقاديـر
وليـا دعيتـه يستجيـب دعواتـي
الأولــة يالله بحـسـن التدابـيـر
تزيـل سياتـي وزيـد حسنـاتـي
والثانيـة يالله عسـا خاتمـة خيـر
جعل أحسن أعمالـي بحـزة وفاتـي
الروح تنزع مثل دلـوٍ مـن البيـر
يبقى الجسد يحمل ملامـح صفاتـي
ثم إحملوني فـوق ذيـك السحاحيـر
من عقب ما صلّوا علـيّ الصلاتـي
ثم أودعوني بيـن ذيـك الحياطيـر
قدمي حصاة ومن خلافـي حصاتـي
وأقفوا وعمّ العلـم بيـن المساييـر
قالوا : دريتوا عنه ثم قيل : ماتي
وبكـوا علـيّ الطيبيـن المناعيـر
وكـل أبلـجٍ ذاتـه معلّـق بـذاتـي*
أحدٍ عليّه يضـرب الأرض ويطيـر
وأحدٍ ذبـح نفسـه بكثـر الشماتـي
وعلى الخدود الدمع يصبح شخاتيـر
ياعيـن وديهـا وياعيـن هـاتـي
وحطّو عزاي وجات الأمـة طوابيـر
وجيههـم بالـحـزن متوشحـاتـي
وأخذوا ثلاث ليـال للحـزن تأثيـر
على الوجيه الطيبـة مـن عزاتـي
وعادوا كما كانوا ضحوك وتباشيـر
إلا إذا مـرت بـعـض ذكريـاتـي*
وأنا جلست وحيد في بيـتٍ صغيـر
مدري حسابك كيـف يـارب ياتـي
لـو أتعـذ ّر ماتفـيـد المعـاذيـر
ولـو أتمنـى ماتفـيـد أمنيـاتـي*
علـيّ مـن رب السمـاوات تقريـر
مرصود في التقريـر كـل إحركاتـي
لا الواسطة تمشي ولا دهنة السيـر
ولاعـاد فيهـا عـرف ومجاملاتـي*
أما إن قبري حفـرةٍ مـن زمهريـر
لين البشـر تبعـث حفـاةٍ عراتـي
وإلا نعيم وخير مـن غيـر تقصيـر
وإن جات هذي والله إنه غناتـي*
يالله تحت رحمتـك ياراحـم الطيـر
وأسألـك حـزات السـؤال الثباتـي