أنــا و أنـتـه تعاهدنا نحب ولا بعد نـقسى

 تسلم ع المروور اخووي

 
يسلمو العيون الباكيه
على وضعك هذه القصة الجميلة ويعطيك ألف عافية

 يسلمو اخووي ع المروور

 الــ ج ــزء الثــالــث

بعد ليلة عصيبة قضاها ريـان بالسجن .. ماذاق فيها طعـم النـوم ولا الراحـة ..
طلع نور الشمس اللي ريان ما يجوفه .. بس شاف ساعته وعرف ان طلع الفجر .. قام وطلب منهم يتوضى بعدين قام يصلي الفجر .. عقب ما خلص قعد يدعي لربه الله يفك كربه ويفرج عنه ..
توه خلص من صلاته .. نادوه : ريـان في لك زيـارة ..
قام ريان وكان متوقع انهم اهله .. طلعوه للمكان اللي المفروض يلتقي فيه بهم ..
لكنه تفاجأ وهو يشوف صديقه [ بـشـار ] .. وش عرفه ذا بالموضوع ..
راح له وهو بعده يفكر .. على طول احتظنه بشار ما عطاه وقت يفكر ..
بشار: ريـــان .. شلونك ياخوي شخبارك ..
ريان يبتعد شوي عنه : والله الحمد لله على كل حال .. انت شدراك ..
بشار : صار لي يومين ادق عليك موبايلك مغلق .. خفت عليك لان موب من عوايدك .. رحت لك البيت .. اخوك تركـي خبرني .. قال لي انك متهاوش مع واحد .. شالسفة؟ ما دشت مخي يا ريان .. شصاير؟
ريـان: اقعد اقعد خل اقولك ..
قعدو و ريان خبر بشّار بكل شي .. لان بشار عارف علاقة ريـان بالجـوري وهو أكثر واحد يعرف أسرار ريان .. لانه صديقه من يوم اهو ياهل ..
بشّار فاتح عيونه : من صجك يا ريان؟ طيب انا اعرفك ما تمسك اعصابك لكن موب لهالدرجة .. شصار عليه الحين طلال؟
ريـان بحقد : ماصار له شي الله ياخذه .. اخخخخ لو ادري ما تركته من بين يديني الا لما اعرف انه مات ..
بشار شوي وتطلع عيونه : وش تخربط انت .. هيه ريانووو .. اعقل يا ريان ماخبري فيك بهالحقد وهالاجرام .. من متى و انت جذي ..
ريـان يلتفت عليه بعصبية : أي واحد يقرّب منها باذبحه .. فاهم؟
بشار خاف على ريان : ريان حبيبي .. الدنيا ما تنأخذ بجنون جذي .. خلك متفاهم شوي .. جذي بتتعب وبتضيع وصدقني بتضيعها معاك ..
ريـان بحزن : عارف .. بس .. ( يرفع راسه ) صدقني .. ما اتحمل .. على طول افكر بهالشي و احاول اقنع نفسي ان خلاص لازم اتعود امسك اعصابي .. لكن حزة الشي ما اقدر .. انسى كل شي .. خصوصا اذا شي يتعلق بالجـوري ..
بشّار يطالعه بقلق : انزين؟ ووش ناوي تسوي اللحين؟
ريان مرفع حواجبه : وش اسوي يعني؟
بشّار : ليكون عاجبتك القعدة اهني؟
ريان بطنازة : تصدق عاد .. حدّي مرتاح .. ( يلتفت عليه ) يعني بذمتك وش بيدي اسوي؟
بشّار : هذا هالطلال موب ناوي يتنازل؟
ريـان : ما اعرف .. الجـوري قالت لي بتكلمه بس مادري عنها شسوت .. بس انا ما اعتقد انه يتنازل هذا نذل ..
بشّار يخبي ضحكته : بيني وبينك من حقه .. لو انا مكانه ما تنازلت خخخخخ ..
ريان يطالعه من طرف عيونه : تتطنز مع ويهك ..
بشّار يقوم يوقف : لا افا عليك .. طيب يلا انا ماشي اللحين .. تآمرني على شي؟
ريان يوقف معاه : وين ؟
بشّار يطالع ساعته : بعد شوي يبدى دوامي .. بروح البيت البس وبروح الدوام ..
ريان تضايق شوي لانه تذكر شغله اللي أكيد راح يفصلونه منه ..
بشّار لاحظ هالشي وحط يده ع كتف ريان : ريان؟ مضايقك شي؟
ريان يرفع راسه بحزن : ايه والله ياخوي .. شغلي ..
بشّار يهز راسه : لا حول ولا قوة الا بالله .. شبتسوي اللحين؟
ريان : وش اقدر اسوي؟
بشّار : اروح اكلم مديرك بالشركة؟
ريان تغير ويهه للاشمئزاز وهو يتذكر مديره : بل .. لا تكلمه هذا واحد نفسه خايسة .. ان كلمته وقلت له بيغلط عليك وعلي بجم كلمة .. اقول خله عنك .. شكلها الوظيفة بخسرها بخسرها ..
بشّار بضيق : براحتك .. يلا تحمل بروحك ..
ريان يحظنه : ان شاء الله انت بعد ..
بشار : مع السلامة ..
ريان : الله وياك ..

طلع بشّار وبطريقه لسيارته شاف اهل ريان داخلين ..
هز راسه بشار وقال : الله يعينهم ويعينك على نفسك يا ريان ..
دخلو بوتركي و ام تركي المركز .. و ام تركي حابسة دموعها بعيونها .. وكاتمة بجيها ..
في اللحظة اللي شافت فيها ريان .. اندفعت تحظنه وهي تبجي : ريان يا وليدي شخبارك وشمسوي اهني ..
ريان تأثر من بجي امه عليه عارف شكثر تعزه وتغليه لانه اصغر عيالها ودلوعها .. عشان جذي ما تتحمل بعده عنها ..
ريان يهدي امه : يمه خلاص بسج بجي .. كاني جدامج مافيني شي ..
ام تركي تسح دموعها : انا ما اتحمل تكون بعيد عني يا وليدي .. ووش سويت بروحك يا ولدي ليش تدخل نفسك بمشاكل ..
ريان يبتسم لأمه ويمسح ع راسها : تعرفينه يمه ولدج عنيد وما يمسك اعصابه .. عاد شوفي عناده وين وصله ..
ام تركي تطقه على ذراعه : اخر مرة لك سامع..
ريان يضحك ويحظن امه : فديييييت قلبج انتي .. اخر مرة وغلاتج ..
ام تركي : ايه قص علي بهالحجي ..
ريان يضحك : هههههههه خلاص ماما شفيج ..
بو تركي : يعني لهالدرجة انا غير مرئي؟
ريان ضحك و بجد توه منتبه لأبوه لان امه لهته .. راح وحظنه : افا عليك .. شلونك الغالي؟
بو تركي : انا بخير .. انت اللي شلونك وشمسوي ..
ريان بعدم اهتمام : عادي نوم وقعده مافي شي اسويه ..
بوتركي : اشوفك مو مهتم ..
ريان ينزل راسه : ليش اهم نفسي بعد .. ما بيتغير شي .. كلها كم يوم وانا طالع ..
بوتركي عصب شوي : اشوفك ماخذ الموضوع هزل ..
ريان يرفع حاجبه: من قال ؟ وبعدين وش اللي اقدر اسويه يعني؟
بوتركي : لا تسوي شي بس مو جذي ولا على بالك .. وبعدين ريان ماخبري فيك راعي مشاكل وهذي سوالفك؟
ريان تضايق شوي ونزل راسه ..
بوتركي يكمل : مرة ثانية حط عقلك براسك قبل ما تخطي أي خطوة وقبل تسوي أي شي .. جوف تسرعك وعدم تفكيرك وين وصلك .. دخولك للسجن مو شي عادي بنظر الناس .. غير جذي مستقبلك .. شغلك .. راح يضيع يعني؟ وبعدين تعال .. انا ما اخبرك انسان متوحش لهالدرجة .. ما تعلمني شصاير بالضبط ؟ وش اللي خلاك تسوي اللي سويته؟
ريان يتنهد بضيق عقب راح حب راس ابوه : يبه انا اسف .. مادري صار اللي صار غصبا عني..
بوتركي : تتأسف لي؟ ليش؟ المفروض تتأسف من نفسك ع اللي سويته فيها ..
ريان : ...... ( ساكت )
بوتركي : زين خبرني شصاير ..
ريان مرتبك : ماصار شي مجرد اني اختلفت مع واحد عديم ذوق وقام يغلط علي ما قدرت امسك اعصابي وصار اللي صار ..
بو تركي بشك : معقولة؟ واحد غلط عليك تضربه كل هالضرب وتدخله المستشفى وتوصل للسجن؟ ( بحدّه ) ريان .. ( رفع راسه ريان بارتباك) خبرني شصار هالكلام ما يمشي ..
ريان وقف وهو يحرك يده بارتباك : وش بيصير يعني غير اللي قلته .. بس هذا اللي صار..
بو تركي وقف : براحتك اذا ما تبي تقول .. بس مرة ثانية حط عقلك براسك .. لا تخلي عصبيتك وجنونك يعمون عيونك ..
ريان : ان شاء الله يبه ..
ام تركي مسحت دموعها وحظنت ريان: ياولدي تحمّل بروحك ..
ريان كسرت خاطره امه ومسحه ع راسها : ان شاء الله يمه .. ادعي لي ..
ام تركي من قلب: الله يفرج عنك ياولدي وترجع لنا سالم ..
حب راسها : تسلمين يمه ..
بوتركي راح حط يده ع كتف ريان وقال : مافي منك يا ريان .. بس لو تمسك اعصابك ..
ريان حب راس ابوه : الله يخليك يبه ..
بوتركي : يلا في امان الله .
ريان : الله وياكم .
ام تركي : مع السلامة يمه ..
ريان : الله يسلمج الغالية ..

طلعو ام تركي وبوتركي .. وقعد تركي مكانه ونزل راسه بيني يدينه والندم ياكل قلبه على امه و ابوه .. ما يستاهلون اللي سواه فيهم .. ولا الجـوري .. اااه يالجوري وينج وحشتيني ماني متحمل بعادج اكثر .. مادري شخبارج ..
قاطع تفكيره العسكري وهو يمسكه : يلا ..
قام ريان معاه ورجع لمكانه ..
**
طلعت من الحمام وسكرت حزام الروب بقوة وقعدت جدام الميز تواليت .. تطالع في شعرها المبلل اللي تناثر على وجهها بإهمال .. تجوف ويهها الذبلان ..
سمعت دق ع الباب ..
الجـوري بصوت خافت : تفضلي ..
دخلت ام الجـوري بقلق ووقفت جنب بنتها ساكتة ..
التفتت عليها الجـوري بحزن : هلا يمه .. فيج شي؟
قعدت جنبها امها ومسحت ع شعرها وقالت بهدوء : الجـوري حبيبتي .. يمه قلبي حاس فيج شي هاليومين منتي على بعضج .. قولي لي يا يمه ... لا تخليني احاتيج ..
الجـوري بإبتسامة باهتة : لا يمه لا تحاتين مافيني شي ..
ام الجـوري : يعني موب عشان ولد عمج وعمج يوم يجون يخطبونج؟ حبيبتي اذا انتي ما تبينه محد بيغصبج على شي وبعدين مو هذا اللي يستاهلج ياالجـوري انا ما بعطيج لأي احد .. انتي عيووني يالجـوري ومافي بنت مثلج ..
الجـوري تحاول تغير الموضوع : ههههه يمة لا تبالغين بعدين اجوف نفسي عليكم خخخخخ..
ام الجوري مبتسمة : ما ابالغ يا حبيبتي .. انتي بنت ماصارت .. ههههههه انتي بنت وريال..
الجـوري: ههههههه يعني سوبر وومن ..
حظنت الجـوري امها بحنان وقالت : و انتي ام مافي منهج .. الله يخليج لي ..
ام الجـوري تمسح دموعها وتقول بمزح : يلا يلا تأخرتي على دوامج قومي ..
الجـوري : ههههه ان شاء الله يمه .. انتي روحي جوفي مروة خليها تستعجل شوي.. تأخرنا..
ام الجـوري وهي تقوم : ان شاء الله يمه ..
بعد ما طلعت ام الجـوري .. جففت شعرها الجوري ومشطته وعقب اخذت موبايلها بتردد وهي تفكر .. تبي تتطمن على ريان .. بس ما تقدر كل يوم تمره بالسجن .. شتسوي؟
تذكرت اخوه تركي .. خافت تتصل عليه ويجرحها مرة ثانية .. بس اهي قلبها متلهف على ريان و اخباره تبي تعرف شلونه ..
اخذت موبايلها بتردد ودقت على رقم تركي اللي من كم يوم تصل لها مهند منه ..
طالعت ساعتها لقتها سبع الا ربع .. كانت متأكدة انه صاحي بهالوقت عشان يروح الدوام ..
انتظرته يرن مدة ..
بالطرف الثاني كان تركي ياخذ شاور .. وبدور نص نايمة ونص صاحية .. سمعت موبايل تركي يرن .. طنشته شوي .. لكن حست بإلحاح المتصل .. مدت يده للموبايل وهي لازالت منسدحة بالسرير .. تبي تجوف من متصل .. لقته رقم غريب .. موب مسيف بإسم معين..
ردت بدور : الوه ..
بالطرف الثاني الجـوري انصدمت .. منو ذي؟ .. عقب شوي تذكرت ان تركي تزوج .. بس تخاف ان مرته تعصب انها داقة ..
نبهها صوت بدور مرة ثانية تقول : الووو؟
الجـوري بارتباك : السلام عليكم ..
بدور عدلت قعدتها وهي تسمع صوت بنت رقيق : عليكم السلام .. مين؟
الجـوري بقلق : أنـ .. أنـا الجـوري ..
بدور بشك: الجـوري من؟
الجـوري : انا بس داقة اسأل تركي عن ريان و أتطمن عليه ..
بـدور كأنها شوي فهمت وقالت بنفور : ايه انتي حبيبة ريان؟
الجـوري غمضت عيونها متضايقة من كلام بدور .. وقالت : اختي ممكن اكلم تركي؟
بـدور فاتحـة عينهـا: لو سمحتي تركي موب مثل ريان عشان تاخذين راحتج وبكل حزة تدقين.. خلج بحالج يابنت الناس .. والأحسن لج تبعدين عن ريان .. سمعت انج وايد مأذيته بحياته وكل يوم مطلعة له مشكلة .. ارجوج ابعدي عن ريلي .. مافينا ع المشاكل..
الجـوري بعصبية من الكلام اللي سمعته : لو سمحتي لا تغلطين .. علاقتي بريان انا حرة فيها ومحد له حق يقولي شنو اسوي وشنو ما اسوي .. وما اعتقد اني غلطت عليج بشي يوم اني دقيت ع ريلج أتطمن على اخوه .. ولا اعتقد اني ضريتكم بشي .. وووو عن اذنج .. باي..
سكرت الجـوري التلفون وعلى طول نزلت راسها ع الطاولة جدامها وفرغت شحنات الدموع اللي كابتتها بداخلها .. اول شي على حبيب قلبها واخوها و ابوها وحياتها كلها ( ريان ) اللي ما تدري عن اخباره شي .. وفوق كل هذا فهو مقطوط بالسجن بسبتها .. و اهله متعذبين عشانه .. وغير جذي .. اهله يكرهونها ويحسونها السبب بمشاكله ..
رفعت راسها وهي تشهق بالبجي وتمسح دموعها اللي ما توقف ..
الجـوري : ياااارب .. تكفى طالبتك لا تردني .. يارب يطلع ريان من السجن ويحفظه ..
انفتح باب غرفتها ودخلت مروة .. شهقت لما جافت اختها تبجي .. راحت تركض صوبها ..
مروة بخوف : جوجو حبيبتي وش فيج تبجين ..
الجـوري تحظن اختها : مروووووة .. ريان ..
مروة تبعدها عنها : ريان شفيه؟
الجـوري: تهقين بيطلع من السجن؟
مروة بحزن : حبيبتي قالو لج ثلاث شهور وبيطلعونه .. ما بيتم على طول ..
الجـوري : بس انه مابيه يظل كل هالمدة لازم اسوي شي و اطلعه ..
مروة: وش تقدرين تسوين يعني يا الجوري .. اللي عليج سويتيه وطلال ما وافق ..
الجـوري منزلة راسها : مروة اهله يكرهوني ويقولون انا السبب ..
مـروة: شعليج منهم .. انتي ما سويتي شي .. اهو اللي رمى حاله بهالمشكلة .. مهما يكون المفروض ما يمد يده ولا يسوي اللي سواه .. بس بعد اللحين ما نقدر نلوم احد .. وبعدين تعالي انتي شدراج ان اهله يقولون جذي ..
الجـوري تمسح دموعها وتقوم : اخووه جافني وكان حاقد علي .. ومن شوي دقيت عليه اتطمن على ريان ردت علي مرته وصرخت علي وقالت لي نفس الكلام .. ( تلتفت على مروة) جفتي يا مروة؟ كلهم يكرهوني اللحين ..
مروة تحظنها بحنان : حبيبتي اهم ما يكرهونج اهم بس خايفين على ولدهم ويقولون هالكلام من حرة قلبهم .. يلا حبيبتي انتي البسي عشان ما تتأخرين على شغلج ..
الجـوري تتنهد بحزن وتقول : ان شاء الله .. انزلي انتي انه بلبس وبنزل ..
مروة ابتسمت لها ونزلت ..
**
اليوم يطلع طلال من المستشفى .. جروحه تقريبا كلها طابت .. بقى بس كسر بيده وكانو لافينها له ..
جمع كل اغراضه .. وباله مشغول بالجـوري وريـان ..
قطع حبل افكاره صوت اخته داخله عليه : هاااااااااي طلال ..
طلال التفت عليها و ابتسم : اهلين غزلان .. ها وين امي و ابوي؟
غزلان مبرطمة يازعم ازعلت : يعني ما يكفي وجودي؟
ضحك طلال وراح جنب اخته وقرص خدودها : اهم شي وجودج .. لا صج ما يو معاج؟
غزلان : اممم لا .. ابوي ما يقدر يطلع من الدوام .. و امي توها بتطلع معاي ياتها جارتنا الهذارة تعرفها بعد .. قلت لها عيل انه بروح حق اخوي حبيبي طلول خخخخ ..
طلال بنظرة جانبية: حركاتهم .. يلا اجوف شيلي الاغراض معاي هههه ..
غزلان : ههه من عيوني ..
اخذو الاغراض وركبو السيارة وطبعا غزلان اللي كانت تسوق ..
من ركبو السيارة والصمت مسيطر .. طلال بعالم ثاني يفكر .. هو لازم اللحين يسوي شي .. يتقرب من الجـوري بس شلوووون ..
مرة وحده قال لغزلان : غزلانو .. اخذيني لذاك اللي ما يتسمى بروح له السجن ..
التفتت عليه غزلان متخرعة : يمه .. لييييش؟ وش تبي فيه؟
طلال بنظرة خبث: ما يقدر يسوي لي شي .. ههه .. انتي بس اخذيني له .. خليني اتطمن عليه اذا كان مرتاح بمكانه ولالا ههههههههه ..
غزلان بقلق : طلال الله يخليك .. خله يولي لا تروح له .. ( بحقد اكثر ) انت حسابك مع ذي اللي ما تستحي على ويهها .. يبيلك تربيها .. ( تلتفت عليه بحماس ) شرايك تتزوجها غصبا عنها وبعدين تأدبها وتعلمها ان مو انت اللي ترفضك عشان واحد مثل ذي ..
طلال يطالع اخته باستخفاف : ماشاء الله عليج فطينة .. البنت كبيرة ومحد يقدر يغصبها .. القانون معاها .. يلا اجوف وديني له وبلا كلام زايد ..
تحلطمت عليه غزلان وفرت ويهها وكملت طريجها لـ ريان ..
و طلال طول الوقت يفكر بس موب متوصل لأي نتيجة ..
وصلوا .. التفت طلال ع غزلان : خلج اهني ماراح أتأخر ..
غزلان تمسك يده : طلال الله يخليك ماله داعي .. وش تبي فيه ..
طلال بملل : غزلان الله يخليج اتركيني انا اعرف شنو اسوي ..
نزل طلال .. طالع المكان بشوية انتصار .. ابتسم ابتسامة جانبية واثقة ودخل ..
دقايق وريان جدامه ..
اول ماجافه ريان حس دم قلبه يفور بغى يروح له يقتله .. لكن وقف مكانه وتذكر المكان اللي هو فيه وتذكر الجـوري .. اخذ نفس عميق واستغر ربه وسوى نفسه بارد ولا هامه ..
قعد وريل على ريل .. حب يقهر طلال اللي عارف انه جاي يقهره .. بس اهو راح يسبقه..
قال ريان لطلال اللي واقف مبتسم بخبث : حياك ليش واقف .. ولو .. ( وقف بسرعه وراح جنبه ) .. ولا ما تقدر تقعد؟ اساعدك؟ ..
طالعه طلال وهو مرفع حاجبه : شكرا استريح ..
ريان يرفع يدينه : براحتك .. اهم شي عندنا راحتك .. امممم طمني عليك عسى ما تعورت وايد .. بصراحه انا قلبي كان ياكلني عليك .. ( يطقه ع صدره يازعم يمزح ) ههه ياخي ما تتحمل مزح انت .. ع طول تطيح علينا جذي ..
طلال يبعد يده متنرفز ..
ريان بسرعه : اوووه عورتك؟ اسف والله .. نسيت انك بسرعه تتألم .. أأأ طيب ليش واقف اتفضل .. تشرب شي؟
قعد طلال ويبغي يستعيد شوية من كرامته ويصير بارد مثل ريان بس القهر ماكل قلبه ..
طلال بقهر مخفي : لا سلامتك ما اشرب شي .. ياي بس اتطمن عليك و اجوف اذا مرتاح بهالمكان ولالا .. اذا شي ناقصك لا تستحي .. تراني مثل اخوك ..
ريان ابتسم وزادت ابتسامته سعة وبعدها تحولت لضحكة قوية .. عقب سكت شوي ونزل راسه .. بعدين طالع طلال بابتسامة ومسك كتفه وقال له : روح لبيتك روح .. مايليق لك الدور .. ولا تظن انك ممكن تحرق اعصابي لاني عرفت انك انسان اصغر من اني حتى التفت جنبك .. هه موب اعطيك اهتمام بعد .. ( ضرب على كتفه بخفيف ) روح يبه روح ..
وقف طلال بعصبية وقال لريان : بتشـوف اذا ما حـرقت قلبك .. انا مو طلال .. هه سلام..
ريان بإبتسامة سخرية : الله وياك .. كل يوم تعال ..
طلع طلال وريان تنهد بعمق وضرب الجدار بيده .. فيه قهر على هالمخلوق ..ما يعرف شلون مسك اعصابه جدامه ..
طلال من العصبية .. طلع من عند ريان وراح للضابط ووقع تنازل عن القضية عشان يفرجون عن ريان .. وطلع من المكان وهو يخطط بطريقة ثانية ..
قال بصوت خافت وهو رايح لسيارة غزلان : وجودك داخل السجن ما يفيد .. تكون بره ونتفاهم وايد احسن ..
ركب السيارة وصفق الباب بقوة وقال لغزلان بعصبية : يلا تحركي وش تنتظرين ..
غزلان تطالعه بخوف وشغلت السيارة وهي ساكته ومشت وهي عارفة ان طلال اذا عصب ما تقدر تكلمه بعدين تروح فيها ..
طول الطريق تلاحظه يفرك يدينه بعصبية وباله مشغول ..
وصلو البيت ونزل طلال قبلها وهي ظلت بالسيارة تطالعه بدهشة .. رن موبايلها .. التفتت ع المتصل وضحكت بوناسة وردت : هلا حياتي ..
دخل طلال معصب وشاف امه بوجهه .. راحت تسلم عليه مستانسة : هلا والله تو ما نور البيت ..
طلال يتعداها رايح لفوق : هلا يمه .. انا تعبان بروح انام لحد يصحيني ..
طلع طلال لفوق و امه واقفه مستغربة
**
فتح باب البيت وطل براسه و ابتسامة خفية على ويهه .. لقى المكان هدووووء ..
دخل وسكر الباب وراه بهدوء .. مشى وهو يتلفت ..
شم ريحة طباخ اللي يعشقه .. غمض عيونه بحب لثواني .. وفتحها بسرعه على صرخة امه : رياااااااااااااااااااااااااان؟؟؟؟؟؟
ريان يحط يده ع قلبه ويضحك : بسم الله خرعتيني ..
راح يركض جنبها ويحظنها ويبوسها ..
ام ريان تبجي وحاظنته بقوة : ريان يمممممه .. متى طلعت وليش ما قلت لنا ..
ريان يضحك مثل الطفل وهو يلم امه اكثر : هههه حبيت اسويها مفاجأة ..
ام ريان تبعده شوي وتطالع ويهه : ريان ياحبيبي الله يخليك لي ولا يحرمني من شوفتك ( مسكته وسحبته معاها وقعدته ع السوفا ) .. ريان يمه تعال خبرني شلون طلعوك ..
ريان بحيرة وهو يطالع لبعيد : اليوم زارني اللي تهاوشت معاه وطلع من عندي وعقب شوي خبروني انه تنازل عن القضية و ان بإمكاني أطلع ( التفت ع امه بسعاده ) اهم شي اني رجعت لج يا احلى ام بهالدنيا ( يبوس يدها ) ..
ام ريان تمسح على راسه : والله انه ابن حلال .. جزاه الله خير ..
ريان بداخله : هه والله انه ناوي على شر .. بس ريان لك يا ولد ابوك ..
ام ريان تضربه ع ريوله بخفة : وين سرحت ها؟
ريان يضحك بخبث ويرفع حواجبه : عند ناس ..
ام ريان بشك وهي تطالع بعيونه : ناس هااا؟؟ منو هالناس؟ ليكون من ورايي بعد .. ( تتقرب منه وتقول بلهفة ) تكفى يمه خبرني اذا في احد ببالك قول لي خلني اخطبها لك و افرح فيييك.. تعرفني .. يوم المنى اللي اجوفك فيه معرس واجوف عيالك ..
ريان بداخله : فديييييييييييييييييتج ياللي في بالي ..
ريان يضحك : هههههه يمه وش لج فيني .. كاهو عندج تركي خله يترس لج البيت عيال .. شتبين بعد ..
ام ريان تمسح على راسه : معليه .. بس انت غير يا ريان .. انت اغلى مافي دنيتي .. ودي اشوفك سعيد مع زوجتك ..
ريان تنهد بحزن بان على ويهه ..
ام ريان بخوف : ريان يمه فيك شي؟
ريان : لا يمه مافيني شي بس سكري هالموضوع لا تكلميني فيه مرة ثانية ..
ام ريان بحيرة : ريان؟ في شي ماعرفه؟ صاير لك شي؟ تكفى خبرني ..
ريان يبتسم لأمه : يممممه شفيج والله مافيني شي .. وصدقيني متى ما تعدلت ظروفي بييج بنفسي وبقولج خطبي لي .. ولا من اللي ما يبي يعرس؟ خخخخخخخخخخ
ام ريان تطقه : ههههه الله يقطع سوالفك ..
ريان : زين يمه انه بقوم اخذ شاور واعدل شكلي .. جوفي لحيتي بس هههههه صج اني خريج سجون ههههههههههه ..
ام ريان تطقه : ريانوه بلا كلام فاضي شهالحجي ..
ريان يبوس راسها : امزح يمه فديتج .. يلا بروح غرفتي .. ولا تخبرين احد اني موجود ها ههههههه بسوي لهم مفاجأة ع الغدا ..
ام ريان تضحك : ههههه احلى مفاجأة يا بعد عمري يلا روح حبيبي ..
راح ريان لفوق غرفته وصعد الدرج بكم خطوة ووصل لغرفته ..
فتح الباب وهو يبتسم للريحة الحلوة اللي امه بخرت غرفته فيها ..
دخل الغرف ورمى نفسه ع السرير .. وغمض عيونه يحس جسمه متكسر وايد لانه ما يرتاح بالنومة بالسجن ..
فتح عيونه ولقى نفسه طايح بحظن الدبدوب الكبييييييير اللي يابته له الجـوري مرة بعيد ميلاده ..
حظن الدبدوب بقوووة وباسه وقال : وحشتنيييييي انت وراعيتك ..
مد يده بجيب بنطلونه وطلع الموبايل ودق على أغلى شي بحياته ..
كل رن يرن فيها التلفون تزداد دقات قلبه .. وحشته وااايد ..
بهاللحظة كانت الجـوري بالسيارة مع مروة رادين البيت من الشغل والمدرسة ..
نزلت مروة من السيارة .. والجـوري مدت يدها ورا تاخذ شنطتها الا الموبايل يرن بصوت إليسا الناعم ..
هونت عليا الدنيا حبيبي و أنا اطمنت معاك
وبعيش على حسك تاني عمري و عمري ابتدأ وياك
مابقيتش بخاف من حاجة و مش محتاجة حبيبي خلاص
لو قبلك راحت مني حاجات بيعوض ناري هواك

انا شفت فيك احلام ما شفتهاش وعرفت بيك أيام ما عرفتهاش
انا بين اديك انا سايبة نفسي ليك جنبك امان و حنان الدنيا بيك

شيرت يدها بمكانها وهي تسمع هالنغمة الخاصة بـ ريان ..
معقولة ؟؟ ريان يدق؟؟؟
دق قلبها بقوة .. وهي تفتح الشنطة وتجوف الشاشة منورة بإسمه ][ أتـ ع ـبنـي ح ــبه ][
فجأة بند التلفون .. لان صار له فترة يرن ..
ثواني بس و عاود الإتصال .. على طول ردت بلهفة بانت بصوتها : ريان؟
ريان دق قلبه وهو يسمع صوت صار له اسبوع ما سمعه وهو ينام ويصحى على أمل انه يسمعه ..
ريان بصوت خافت : مشتاااااااااق ( رفع صوته ) وربي مشتاق ..
الجـوري نزلت دموعها وقالت بصوت متقطع من البجي : ر.. ريــ ...ـان ؟
ريان بوله : ايه ريان يا عيون ريان انتي ..
الجـوري تبجي : انت وين؟
ريان يحظن الدبدوب وينسدح براحة وهو مبتسم : انا بالبيت تحديدا منسدح على السرير وبالضبط في حظن دبدوبي هههههه ..
الجـوري تضحك ضحكة تخالطها دموع الفرح : بجد ريان؟ احلف انك بالبيت؟ مو مصدقة..
ريان يضحك : لا حياتي صدقي .. انا بالبيت ..
الجـوري تمسح دموعها : شلووون ؟ شلون طلعت؟
تخرعت الجوري وهي تسمع صوت دق ع الدريشة جنبها .. رفعت راسها الا مروة واقفة تأشر لها يعني ما بتنزلين؟
أشرت لها الجـوري يعني بعدين بيي ..
مروة حست اختها مستانسة بس قالت ادخل داخل انتظرها احسن بعدين تقول لي شصاير ..
الجـوري : هلا معاك .. ها قول لي شصار ..
ريان : ابد .. ولد عمج العزيز تنازل عن القضية ..
الجـوري بفرح : صج والله؟؟
ريان بتفكير : لا تستانسين انه حاس انه ما تنازل الا وراه شي .. فاهمه انه ..
الجـوري بخوف : لاااا .. تهقى جذي ريون؟
ريان : متأكد مليون بالمية .. اوكيه حياتي انسي هالموضوع انه بقوم اللحين اخذ شاور و اضبط شكلي و انزل لهم تحت للحين ما جافوني و اكلمج العصر .. ماشي حبي؟
الجـوري : انتظرك ..
ريان : باي حبيبي ..
الجـوري : باي ..
سكرت الجـوري التلفون بوناسة وهي تضحك .. ونزلت من السيارة بتدخل ع البيت .. وتوها بتدخل الا تسمع صوت وراها .. صوت تعرفه زين ..
....... : الجــوري ..
التفتت الجـوري على طلال اللي واقف يم سيارته .. دق قلبها بخوف : نعم..
تقرب منها طلال وقال وهو رافع حاجبه : هه ما تنازلت حبا فيه ولا عطفا عليه .. ما تنازلت الا لاني ابي انتقم منه بنفسي .. السجن ما بيسوي له شي ..
الجـوري بقهر: طيب والمطلوب؟
طلال بإبتسامة خبيثة : المطلوب يا حياتي انج تفهمينه هالشي عشان يكون على علم مسبق هههههههههههههه .. سلام ..
مشى طلال وركب سيارته وراح .. والجوري ضربت الأرض بريولها وقالت بقهر : سخيف..
التفت بتدخل البيت وهي مو هامها تهديدات طلال لانها عارفة ريان قدها وقدود وموب واحد مثل طلال هو اللي يقدر عليه ..
اهم شي انها مستانسة ان حبيبها ريووون طلع من السجن ..
دخلت البيت وراحت على طول غرفتها بتبدل ملابسها .. فتحت الباب الا لقت مروة قاعده ع لاسرير تنتظرها .. ضحكت الجـوري عليها وهي تروح تحط شنطتها ونظارتها الشمسية ع الطاولة ..
مروة : شفيج تضحكين
الجـوري تقعد جدامها ع السرير وهي تنزل شيلتها ع جتفها : اضحك عليج يالملقوفة .. تنتظريني ها؟ هههههههه
مروة : ههههه شدراج .. انزين بسرعه قولي لي من اللي كلمج بالتلفون وشعندج جذي شاقة الحلج .. بسرعه بسرعه قولي ..
الجـوري تضحك بحيا : هههههه اول شي عازمتج اليوم ع العشا في أي مطعم تبينه ..
مروة تصرخ : والله؟ ( وحظنت اختها ) ياي وناسة مشكورة .. ونروح السينما بعد ..
الجـوري : هههههه لج اللي تبينه ..
مروة بوناسة : بس للحين ما قلتيلي شصاير؟
الجـوري وهي تعض على شفايفها بحيا : رياااااان ..
مروة : اوووه يلا قولي ريان شفيه ..
الجـوري : هههههههه ريان طلع من السجن ..
مروة نطت على اختها حظنتها وطيحتها وطاحت هي فوقها ..
الجـوري تبعدها عنها : مرووه يالمينونة قومي عني هههههههههه ..
قامت مروة عنها وقالت : ههههه عن جد جوجو؟
الجـوري تعدل قعدتها : أي كلمني من شوي .. وقال ان طلال تنازل عن القضية .. لكن طلال ما تنازل بس جذي .. لانه حاب ينتقم من ريان بطريقته ع قولته ..
مروة بخوف : شبيسوي ذي المينون
الجـوري توقف : ماعليج منه خليه يولي ما يقدر على ريووووني حبيبي هههههه ..
مروة : ههههههه اهم شي اليوم بنطلع ههههه
الجـوري : هههه صج انج متخرعة .. يلا انزلي خبري امي اني ييت .. ببدل ملابسي وبنزل نتغدى ..
مروة متجهة للباب : ان شاء الله ..
مرة وحده وقفت مروة مكانها و التفتت على الجـوري بإبتسامة وراحت لها باستها : احبج جوجو .. الله لا يحرمني منج ..
الجـوري مبتسمة : ولا يحرمني منج ..
طلعت مروة .. وظلت الجـوري مستانسة ..
**
ع الغدا تجمعو بو تركي و ام تركي و تركي وبدور ..
توه بو تركي بيبدا ياكل : بسم الله ..
ام تركي تبتسم : لحظة شوي للحين ما كملنا عشان تاكلون ..
تركي يلتفت عليها : من بعد؟
ام تركي التفتت ع الدرج اللي كان واقف عليه ريان يضحك ..
الكل التفت معاها وشهقوا ..
راح تركي يركض وحظن ريان وهو يضحك ..
ريان : ههههه بسك خنقتني يالدب ..
تركي يبتعد عنه شوي ويطقه على راسه بخفه : ريانو يالحمار ليش ما قلت لي انك بتطلع ..
ريان وهو ينزل مع تركي : والله حبيت اسوي لكم مفاجأة ..
نزل وراح حب راس ابوه اللي حظنه بدوره : الحمد لله على سلامتك يا وليدي ..
ريان : الله يسلمك يبه ..
بدور : الحمد لله ع السلامة ريان ..
ريان : الله يسلمج خيتوووو ..
تركي : ها يعني متفق مع الوالده ها .. من متى انت هني ..
ريان يقعد مكانه ع الكرسي : ههههه والله ماصار لي ساعتين من وصلت ..
تركي يطقه : خاين ..
بو تركي : ما قلت لنا شلون طلعت؟
تركي يلتفت عليه : أي والله شلون طلعت انه بس جفتك نسيت كل شي ..
ريان : ( خبرهم بكل شي ) ..

بعد الغدا طلع ريان مع تركي بره عند حديقة بيتهم يتمشون ..
تركـي : شبتسوي ع الدوام ..
ريان بتفكير : مادري بروح بكرة بجوف .. مع ان ما اعتقد يفصلوني .. لاني المدة اللي غبتها اسبوع بس .. بتفاهم معاهم ..
تركـي : يلا ان شاء الله خير ..
سرح ريان شوي .. وصحاه تركي : هلووو ريان ..
ريان يلتفت عليه : هلا ..
تركي : شفيك سرحت مرة وحده ..
ريان يتنهد ويطالع لبعيد : يعني في شنو بسرح غير هالموضوع اللي شاغل بالي ..
تركـي مو عاجبه الموضوع : ريان والله انت بالش عمرك بوحده ماذيتك .. ياخي خلها وفكنا و ارتاح من هالهم ..
ريان يلتفت عليه بعصبية :تركي .. كم مرة قايل لك مابي اسمع هالكلام .. انت ما تعرف اني احبها .. احبها ياخي مافهم هالكلمة؟
تركـي : أي حب أي بطيخ يا ريان اللي توهم نفسك فيه ..
ريان فاتح عيونه على وسعها : اللحين حبي وهم؟
تركـي : مع ذي الانسانه؟ أي وهم .. مادري شتحب فيها؟ هالمشاكل اللي كل يوم مسويتها لك؟ ولا رفضها لك ؟
ريان منزعج : تركي .. الجـوري ما رفضتني لشخصي ولا لانها ما تحبني .. عندها ظروفها و أسبابها .. و انت عارف كل شي .. وبعدين انا معاها احس اني ملكت الدنيا كلها .. اهي تحسسني بالحيـاة .. اجوف نفسي فيها .. تعرف يا تركي شلون لما تحس الانسانة اللي انت تغليها اكثر من كل شي بهالدنيا تعتبرك رجل حياتها و انت المنقذ الوحيد لها و انها مالها بهالدنيا غيرك .. لما تخاف ماعندها غيرك ولما تفرح ماعندها غيرك ولما تحزن وتحتاج وتستانس وتنجح وتفشل .. في النهاية مالها الا انت .. ( يلتفت عليه ) تعرف يا تركـي .. الجـوري هذي اهي الانسانة الوحيدة اللي لما اكون معاها انسى كل همومي وكل مشاكل و احس ان الدنيا بعدها بخير و ان في احد يخاف علي ويهتم فيني و أهمه بكل شي .. اهـي مصدر قوتـي وضعـفي بنفس الوقت .. اهي اللي تمدني بالقـوة و اهي نفسها اللي تخليني بأضعف حالاتي جدامها .. لان يسلبني حبها كل قوتي .. ااه شقولك بس .. لو اتكلم من اليوم لباجر ما بتحس فيني ..
تركي يطالع اخوه يحسه متعذب وكل كلمة كان يقولها يحس بكل حرف ينطقه منها .. طوق كتف ريان بذراعه وقربه منه وقال له : انا ما اتمنى لك الا كل خير ياخوي ومع البنت اللي تريحك .. اتمنى ينتهي هالعذاب ..
ريان هز راسه وهو يبتسم ابتسامة خفيف ونزل راسه وقال : الله كريم يا تركي ..
**

 ارحـــــــبـــــو..



مشكووورة خيووه


قصة روووعة


وتم قراءة الجزءين

لاخلا ولا عدم خيووه

 يسلمو ع المرور