أنــا و أنـتـه تعاهدنا نحب ولا بعد نـقسى

قـائـمـة الأوسـمـة · #1

أنــا و أنـتـه تعاهدنا نحب ولا بعد نـقسى

][ أتـ..ـعبـ..ـنــي حـ..ـبـ..ـه ][

.. الـ ج ــزء الأول ..

العصبيــة
.
.
الحنــان
.
.
الجنون
.
.
الغيـرة
.
.
الحـسـاسيـة
.
.
الحــب
.
.
التهور
.
.
الرومانسيــة
.
.

كلها صفات تحمل بين طياتها معاني جميلة و معاني مخيفة ..
لكن كلها مزيج يكوّن.. [ريــان]

طلع من مجلس بيتهم وبيده موبايله يرن .. ابتعد عن الازعاج و صوت الأغاني وضجة العرس .. عرس اخوه الوحيـد [ تــركــي ] .. اللي اكبر منه بسنتين وعمره 29 سنة ..
ابتعد شوي عن مجلس بيتهم المتواضع .. نظرا لحالتهم المادية اللي نقدر نقول عنها متوسطة اذا ماكانت متدنية ..
وقف قريب شجرة صار لها سنين هي بهالبيت وتحمل ذكريات حلوة لـ ريان و اخوه تركي .. شاف المتصــلة [ دلــوعتــي ] ..
بعـد خصلات شعره المتعرقة من حرارة الجو بيده .. ورد ع التلفون وهو يستند ع الشجرة ويخلي يده بجيب ثوبه اللي ما تعود يلبسه ..
ريــان بـتعـب : هلا حياتــي ..
ردت عليه بخدود متوردة من كلمة ( حياتي ) لكنها حست بنبرة التعب وقالت: ريان ..
ريــان يرجع راسه لورا ويتنهد : عيونــه ..
الجـوري برقة وخوف : وش فيه صوتك ؟
ريان وهو يتأمل القمــر فووقه : متـى بـس راح يجــي اليــوم اللي اكون فيه مكان تركي ..
نزّل راسه و قام يتمشى وكمّل : ابيــج يا الجـوري .. أبيج لي .. لي متى بس؟
الجـوري بحزن تحاول تخفيه : الله كريم يا ريان .. ( كملت كلامها وهي تحاول تغير الموضوع ) .. ها وشلون العرس؟
ريان يطالع ناحية المجلس : والله حلووو .. ليلحين الجماعة اهني .. شكلهم يبون يباتون الليلة عندنا هههههه ..
الجـوري تطالع ساعتها : توها الساعه 12 انتظر عليهم شوي بعد .. انت وينك عنهم؟
ريان : لا كنت معاهم بس دقيتي علي قلت اطلع برا اكلمج لان داخل فوضى ..
الجوري : وشلونه تركي؟ مستانس؟؟
ريان : ههههههه الا بيطير من الوناسة ..
الجوري : الله يسعده ..
ريان : صحيح وشلونها امج اللحين .. ان شاء الله صارت احسن ..
الجوري تنهدت وقالت : الحمد لله اخذت دواها من شوي ونامت .. سوري ريان والله ياريت كنت اقدر احضر العرس .. بس مو بيدي ما اقدر اترك امي بروحها بالبيت وهي تعبانه ..
ريان : مو مشكلة حياتي .. اهم شي راحة امج ..
سكتو شوي و كانو يفكرون بنفس الموضوع ...
رفع ريان طرف ثوبه بيده وقعد على عتبات الباب وقال بصوت هادئ يحمل في داخله براكين : للحين الواطي يتصل عليج ..
الجــوري بلعت ريقها بصعوبة وقالت بخــوف من ريان : لالا مـ .. مـا يتصل من اخر مرة كلمته امي فيها ما اتصل ..
ريان يرص ع اسنانه بقهر ويضرب الارض بيده ويقول : اخخخخ لو تاركتني ذاك اليوم اذبحه..
الجـوري خافت من تهـور ريان بهالموضوع الحساس وقالت : خلاص ريان ماعاد يتصل صدقني.. انت لا تشيل هم خله علي ..
صرخ ريان : مالج شغل فيه .. اتركيه يولي .. ولا اشوفج مكلمته ولا راده عليه ولا بحرف ..
الجـوري بترجي : ريان .. حبيبي .. اهدى .. المشاكل هذي ما تنحل بعصبية ..
ريان يقوم على طوله : ما اقدر .. جوري صدقيني ما اقدر .. احس شي يخنقني .. شي يحرق قلبي كلما اتذكر ان في احد يفكر فيج غيري او يبيج ويحاول ياخذج مني .. ( يصرخ ) انتي ليييييييي وبس ..
الجـوري تعبت من مزاج ريان العصبي على طول : طيب ريان بخليك اللحين مع العرس .. و انا بروح انام وراي دوام بكره ..
نزل راسه ريان بحزن .. لان عارف ان هذا طبعه وما يقدر يغيره وهذا الشي اللي يزعل الجوري منه : اسف حبيبتي .. تصبحين على خير ..
الجوري بحزن : و انت من اهله ..
سكر التلفون وضرب الجدار بيده بقهر .. خذ نفس ورجع شعره لورا بيده .. تحسس أطراف شعره بأصابعه .. وقال : يبيله قص شوي وايد طويل ..
ابتسم وهو رايح للمجلس مرة ثانية وفي ذكرى تمر على باله .. لما كانت الجوري كلما شافته تعلق على شعره شكثر طويل .. لي رقبته ..

سكرت الجوري الموبايل وخلته على جنب و انسدحت ع السرير وهي تفكر بالأيام الصعبة اللي مرت عليها بالفترة الأخيرة .. ريان من صوب .. طلال ولد عمها من صوب .. وعمها من صوب .. ومرض امها الكبيرة اللي تعبها ..
وهي تفكر بأحزانها .. غلبها النوم .. ونامت ..

++++

الجوري .. بنت طيبة وعلى نياتها .. شفافة .. رقيقة .. حبوبة .. مسالمة .. رومانسية .. حالمة .. بس القدر كان اقوى منها ..
تعيش مع امها و اختها الصغيرة بروحهم في بيت .. بعد ما تركهم ابوها وكانت توها متخرجة من الثانوية !!
بعد ما توفى ابوها .. لقت نفسها مسؤولة عن امها و اختها الصغيرة اللي صار اللحين عمرها 17 سنة والبيت .. وخصوصا ان امها حرمة كبيرة ..
تخلت الجوري عن حلمها بالدراسة بالجامعة والتخصص اللي كانت تطمح له من صغرها .. ونست كل تعبها ايام الدراسة عشان توصل للي تبيه ..
وراحت تشتغل عشان تعيش اهي و امها و اختها بكرامة بدون ما يحتاجون لأحد ..
كان عندها عم واحد اللهو بو طلال .. كان ما يفتكر فيها لا اهي ولا امها .. اصلا اهو ماكان علاقته مع ابو الجوري طيبة وايد على ايامه .. عشان جذي ما يهتم فيهم اللحين ..
يتدخل فيهم بين الفترة والثانية بس عشان يفرض سيطرته عليهم بأشياء تضيق عليهم حياتهم..
الجوري وصل عمرها 21 سنة .. وهي ليلحين تشتغل بنفس الشركة اللي من خلصت المدرسة للحين و اهي تشتغل فيها .. طبعا حصلت على عدة ترقيات لنشاطها بالشغل وأعطوها دورة تدرس فيها سكرتارية لما صارت سكرتيرة مدير الشركة ..
تعرفت على ريــان بذاك اليـوم اللي كان جاي فيه للشركة يدور على وظيفة .. توظف لفترة قصيرة بهالشركة .. وكان يشتغل مع الجوري بنفس المكتب .. و أعجب فيها وايد وفي أخلاقها.. وتقرب منها .. لما حصل على أعز ما تملك .. قلبها ..
وبطبيعته ريان .. وحبه لتملك كل شي يعجبه و اصراره على الحصول عليه..
فاز بقلبها بسرعه ..
لكن سرعان ما فصلوه من هالشركة بسبة انه تمشكل معاهم وفصلوه .. وحصل له وظيفة ثانية بشركة ثانية .. و الجوري تساعده كثر ما تقدر عشان ما تخليه ينفصل مرة ثانية من هالشركة..

كان طلال ولد عم الجوري شاب متغطرس مثل ابوه .. وهو وحيد ابوه .. و ابوه يدللـه وايد .. وكل شي يبيه لازم يحصل عليه .. وحسباله كل شي بهالدنيا يبيه يكون ملكه ..
حط عينه على الجوري .. مع انه ما لها بقلبه حب ولا هم يحزنون ..
وطبعا معروف عنه انه شخص مغازلجي .. وراعي خرابيط ..
عشان جذي الجوري ما تقرب منه ولا تحبه .. وغير جذي هي تحب ريان ..
ريان؟ وش هو ريان بالنسبة للجوري؟
بنت في حالتها ذي ومتمسكة بهالانسان كثر ما تقدر .. وتحاول ما تفقده ابد .. ومستعدة تسوي اي شي عشانه ..
وش بيكون يعني لها يعني؟؟
ريان هذا هو أملها الوحيد بهالحياة من بعد امها لما تتركها ..
ريان هذا الشخص الوحيد اللي احتواها بحنانه وخوفه عليها .. بجنووونه بحبها بغيرته عليها .. بتمسكه الغير طبيعي فيها ..
كانت تجوف فيه النور اللي تشوف منه الدنيا ..
تشوف فيه ام و ابو و اخو و صديق وحبيب وزوج وكل شي .. في كل موقف .. يتحول لها كواحد من هالاشخاص اللي تحتاجهم بحياتها ويساعدها ..
حبه لها كان حب جنوون وراح تعرفون وش اقصد بكلامي مع الاحداث ..

بآخر الايام عرف ريان بقصة طلال اللي يعترض طريق الجوري بكل مكان وبكل وقاحه .. وفاااار دمه .. خصوصا لما طلال اخذ ابوه وراح لبيت الجوري يخطبها .. والجوري طبعا رفضت .. لكن بو طلال سوا لهم سالفة .. و ام الجوري ماكانت موافقة لانها ما تبي ترمي بنتها عند عائلة مثل هذول .. تبي سعادتها ..

بو طلال طبعا توعد فيهم انه يزوجها غصبا عنها لانه عمها .. بس اهي ردت عليها بأنها تجاوزت السن القانوني وصار عمرها 21 سنة وهي مسؤولة عن نفسها وتقدر ترفض ومحد يقدر يجبرها على شي ما تبيه .. وما راح يتم شي بدون رضاها ..
ترك البيت بعد ما عفس المكان وتوعد فيهم وطبعا حط الكلام الشين بالجوري وطعنها بأخلاقها بلا ضمير وتركهم ومشى وناسي او متناسي ان وراه خواطر مكسورة بكلامه ..
تعبت ام الجوري بهالمكشلة .. نظرا لكبر سنها وما تقدر ع المشاكل ..
والجوري تعبت وايد بهالسالفة
وخصوصا مع ريان اللي ماكان راضي يتفهم الوضع و ان تدخله ما راح يكون بصالح الجوري .. و كان مصمم انه يروح لطلال هذا ويتفاهم معاه بطريقته ..
وطبعا ما يحتاج اعلمكم عن طريقته هذي .. لانكم راح تعرفونها مع الاحداث
وهذا اللي يخوف الجوري منه ..

كان ريان يلح على الجوري بطلب الزواج لكنها كانت ترفض بكل مرة ..
كانت تضحي بسعادتها معاه عشان ما تترك امها و اختها اللي محتاجتها توفر لها مصاريف الدراسة وتوقف بجنبها وتساعدها بحياتها ..
وكانت تبي اختها توصل للي هي ما قدرت توصل له ..
مع ان ريان كان يوعدها انه ماراح يتخلى عن اهلها ويساعدهم .. بس اهي رفضت .. ولكن بنفس الوقت تحس بالذنب تجاهه .. لانها حارمته من حقه .. من حقه يتزوج البنت اللي يحبها..
بس ماكانت تجوف بيدها حل تقدر تسويه له .. ولا ماكانت تأخرت ولا حتى ثواني في قربها منه

+++++

في صباح جديد على بيت الجــوري .. قعدت جوري من النوم وتجهزت للدوام .. ونزلت لأمها اللي كانت تجهز الريوق .. حبتها على راسها : صباح الخير يا احلى ام انتي ..
ام الجوري مبتسمة : صباح النور حبيبتي .. ها وينها اختج للحين ما خلصت؟
الجوري تنادي اختها بصوت عالـي : مــــــــــروة .. مروووووووه وينج بسرعه تأخرنا..
نزلت مروة بلبس المدرسة وشنطتها ع كتفها وهي تلف الشيلة بسرعه : كاني كاني ييت..
راحت قعدت معاهم: صباح الخير .. يوعانه يممممه بسرعه صبي لي حليب ..
امها تخزها بنظرات : والله محد قالج ما تعشين امس..
مروة تذكرت السالفة اللي سوتها امس لبيتهم و اكلت وهي ساكتة ..
امها طالعت الجـوري بقلة حيلة .. و هزت راسها الجوري من تصرفات اختها ..
امس في الليل اعفست عليهم المكان الا يشترو لها لاب توب .. ماتبي الكمبيوتر اللي عندها .. حاولت تقنعها الجوري انها موفرة هالفلوس اللي عندها عشان يسافرون بالصيف لكن مروة مستحيل تفهم .. عنييييدة ..
حاولت الجوري تغير الموضوع وقالت لأمها : ها يمه ان شاء الله صرتي احسن؟
ام الجوري بحنان : الحمد لله يابنيتي .. اكاني بخير ..
الجوري وقفت : يلا مروة تأخرنا .. (التفتت على امها ) يمه فديتج لا تطبخين شي اليوم انتي تعبانه .. انه ان شاء الله باشتري غدا من المطعم و انا رادة ..
ام الجوري : اللي تجوفينه يا بنيتي .. تحملو بروحكم ..
الجوري وهي ماشية ووراها مروة : ان شاء الله و انتي بعد يمه .. يلا مع السلامة ..
مروة مالها قلب تسوي جذي بأمها .. راحت وباست راس امها وقالت : مع السلامة يمه ..
طلعو ثنتينهم و ام الجوري مبتسمة وتدعي لهم الله يوفقهم ..
ركبو السيارة مع بعض ومشت الجوري وهي ساكتة .. بعد فترة انتبهت ان في سيارة تلحقهم .. و ارتبكت الجوري كل شوي تجوف المنظرة تجوف هاللي لاحقهم .. وطبعا كان طلال ..
تأففت من حركاته حركات المراهقين ..
انتبهت مروة للجوري وقالت لها : شفيج؟ من ورانا؟
الجــوري بعصبية : شوفي بنفسج ..
التفتت مروة ورا وشهقت وخلت يدها ع بوزها وقالت : امبييييه هذي طلال ..
الجوري زادت سرعتها ..
مسكتها مروة : الجوري اهدي شوي خليه يولي ماعليج منه ..
الجوري : ابي اعرف هذا شلون يفهم .. الف مرة فهمته اني ما اشتهيه ولا ابيه .. وش حركات المراهقين ذي اللي قاعد يسويها ..
مروة ناظرت اختها بحيرة وسكتت ..
وصلو مدرسة مروة الثانوية .. ولا زال طلال مستمر في ملاحقتهم ..
وقفت الجوري تنتظر مروة تنزل ..
لكن مروة التفتت ع اختها وقالت بحيرة : الجـوري .. طلال يحبج .. ليش ما توافقين تتزوجينه؟ اعرف ان حركاته ذي موب حلوة بس يمكن يسويها لانه يحبج ..
التفتت الجـوري لمروة وقلبها يدق خايفة تنكشف علاقتها بريان جدام اخ تها مروة اللي تعتبرها مثلها الاعلى .. وما بتقدر وضع الجـوري انها بحاجة لرجل في حياتها يسندها .. لانها مرأة ضعيفه .. وهي مالاقت هالشي الا بـ ريان ..
الجـوري تحاول تخبي انفعالها وقالت : لو اخر ريال بالدنيا اهو طلال ما تزوجته ..
مروة بحيرة : ليش؟
الجوري : انتي ما تجوفي تصرفاته؟ هذا واحد عمره 25 سنة؟ هذا ياهل .. وبعدين انه مابي واحد مثله مدلع .. كل طلباته مجابة وكل شيي اييه بالساهل .. ما تعب على عمره ولا درس ولا حكّته الدنيا .. واحد ما يعرف الا الوناسة والتسلية .. شخص غير جدّي بتاتا .. ومستهتر .. و غير هذا انه مابي اتزوجه ونصير تحت رحمة عمي .. و بعدين انه شلون اتزوج وا ترككم .. انه يا مروة ابي اجوفج متخرجة من الجامعة ومحققة الحلم اللي انه ما قدرت احققه لنفسي .. ( ابتسمت لها ومسحت ع راسها ) انتو اهم شي بحياتي يا مروة .. انتي و امي .. ما راح اتزوج و اتخلى عنكم الا اذا جفتج عروووس ..
مروة بحزن : بس جذي بتظلمين نفسج يا الجـوري .. من حقج تتزوجين وتجوفين حياتج ..
الجـوري لاحظت طلال لازال موجود ووجوده يثير الشك فقالت لمروة : حبيبتي مروة انتي انزلي اللحين .. تأخرتي .. و انه بعد تأخرت على دوامي ..
مروة باست اختها بحزن : احبج جوري .. وسامحيني على امس ..
على طول نزلت من السيارة ودخلت مدرستها ..
ابتسمت لها الجوري .. ومشت ..
دخلت مروة المدرسة وهي شاردة بتفكيرها عند اختها اللي محيرتها .. تحس ان في شي ..
لقت في ويهها رفيجتها جمانة ..
جمانة : شفيج مراوي؟
مروة وهي تنزل شنطتها وتنزل الشيلة : مافيني شي ..
قعدت جمانة مقابلة مروة وقالت لها : امبلى مروة فيج شي .. ما تعودنا تخبين عني يلا قولي ..
مروة : ( خبرت جمانة بكل شي )
جمانة بتفكير : اختج صاجة .. تحس نفسها مسؤولة عنكم .. مو معقولة بتتزوج وبتخليكم بالبيت لحالكم .. بس مادري انا احس في شي ثاني ..
مروة : والله؟ يعني نفس تفكيري .. بالله وش تظنين فيه؟
جمانة بلا مبالاة : يمكن تحب واحد ..
مروة مفتحة عيونها ع الاخر : نعمممممم؟؟؟ جوريووو تحب؟ مينونة انتي؟ انتي ما تسمعين محاظراتها لي؟
جمانة : حبيبتي اختج تعطيج هالمحاظرات عشان ما تصدقين شباب هالايام اللي نصهم اذا مو ثلاث ارباعهم يجذبون .. فهي خايفة عليج .. بس مو معناتها انها رافضة مبدأ الحب ..
وبعدين اهي كبيرة وعاقلة .. تعرف وين مصلحتها اذا حبت ..
مروة بحيرة : تهقين يعني؟
جمانة : اهو مجرد تخمين يعني .. انه مادري بالصج .. بس يمكن يكون احد الاحتمالات ..
مروة : انزين جمون .. اذا اهيا تحب .. ليش ما تتزوج اللي تحبه؟
جمانة : يااااااكثرها أسئلتج .. انه شدراني .. يمكن عنده ظروف .. يمكن مثل ماقالت لج ما تبي تترككم بروحكم بالبيت ..
مروة تفكر : امممممم ..
جمانة تسحبها : خلي عنج الأوهام وقومي خل نجوف الربع ..
مشت مروة معاها بجسدها بس عقلها عند اختها ..
**
اما عند الجـوري فهي طنشت طلال اللي ملاحقها .. يعني وش بيسوي لها؟ خلته يولي ..
وصلت الدوام ونزلت من سيارتها ودخلت الشركة اللي تشتغل فيها بسرررعه .. وراحت على مكتبها .. للحين المدير ما داوم .. خذت موبايلها ودقت على ريــان ..
ريان للحين يتقلب بفراشه .. مد يده للتلفون ورد عليه وهو للحين مغمض عيونه : هممممم؟
الجـوري دق قلبها لصوته الحلو : صبــاح الــورد ..
ريان ابتسم ولازال مغمض وقال بنعومة : صباحج جوري يا احلى جوري ..
الجـوري : للحين نايم يا كسلان؟
ريان يمدد جسمه : اييييه امس نايم متأخر خبرج العرس بعد ..
الجـوري : يعني ماراح تداوم اليوم؟
ريان : امبلى بس خبرتهم اني بتأخر شوي .. زين انج صحيتيني ..
الجـوري : يلا يلا بلا كسل قوووم ع الدوام ..
ريــان : تآمريني امر انتي .. يلا اللحين قايم ..
الجوري مبتسمة له : يلا اكلمك بعدين .. عقب الدوام .. ماشي؟
ريان يقوم من السرير : ماشي حياتي ..
الجوري : يلا مع السلامة ..
ريان : في امان الله حبيبتي ..
**
في القسم المخصص لتـركي وزوجته بـدور ..

**
في نهاية الدوام .. طلع ريان من دوامه .. مسك الموبايل ودق على الجـوري وهو رايح للسيارة..
دخل السيارة وقال : هلا وغلا حبيبتي .. الحمد لله بخير .. والله؟ اوكيه عيل حبيبتي انه بييج باخذ منج المفتاح وباخذها اوديها الكراج .. اي صج .. طيب انتي اوكيه مشي فيها وروحي اخذي اختج و انا بييج عند البيت وباخذ السيارة .. اي شسويلج بعد .. شلون اخذها منج .. اوووكيه زين عيل .. اوكيه بييج اللحين انتظري بس دقايق .. يلا باي ..

سكر تلفونه و مشى السيارة و اهوا مبتسم .. يحس بسعاده كبيرة لما تحتاجه الجـوري وتحسسه انه الريال الوحيد بحياتها اللي تعتمد عليها وتحتاج له ..
وصل لي الشركة اللي فيها الجـوري ووقف ينتظرها جنب سيارتها ..
طلعت الجوري ولما التفتت لريان نزلت راسها بحيا .. من زمان ما جافته ..
وصلت لعنده وهو يطالعها بنظرات ولهانه وقال لها بحب : الله الله شهالحلاة .. طالعة نعومة بالوردي ( وغمز لها )
الجـوري توردت خدودها وماعرفت شتسوي .. مسكت طرف شيلتها تلعب فيه من الحيا ..
ريان : ههههههههه اوكيه ادري فيج مستحية .. يلا ما بعطلج ..
فتحت الجوري شنطتها وعطته مفتاح السيارة السبير الثاني .. وراحت بتركب سيارتها ..
ريان مبطل عينه : حرام عليج سمعينا صوتج عاد ..
الجـوري بحيا وهي تدخل السيارة : يلا انا رايحه اخذ مروة .. و على طول ع البيت .. ع فكرة .. انتظرنا ندخل البيت بعدين اخذ السيارة .. مابي مروة تجوفنا ..
ريان مبتسم لها : ان شاء الله على امرج .. يلا باي ..
الجـوري تناظره : باااي ..
وقف مده يطالعها ويتأمل عيونها وقلبه يدق بقوة .. ليما نزلت راسها الجوري وحركت السيارة..
ريان : ااااااخخخخ يا قلبي .. متى بس تحن علي ..
راح دخل سيارته وعلى طول ورا الجــوري .. كان ناوي يمشي وراها ليما تروح المدرسة وللبيت ..
ورا سياراتهم اثنينهم كان في سيارة تراقبهم .. وكان معصصصصصب ..
ضرب بيده ع الستيرنغ وقال : والله وهذي سواياج يابنت العم .. اوريييييج بس ..
كانت الجـوري تمشي وموب منتبهة في طلال اللي كان ورا ريـان .. اما ريان لاحظ وجود هذي السيارة وراه بس ماكان يعرف صاحب السيارة فطنشه ..
وصلو لي المدرسة ووقفت الجـوري تنتظر مروة تيي .. وريان بركن سيارته قريب منها ..
وصل طلال بسرعه رهيبة ووقف سيارته ورا الجـوري .. انتبه ريان ان هذا الشخص هو اللي كان وراه .. قرر ينزل من السيارة بس انتظر شوي ..
وصلت مروة .. وتوها بتركب السيارة .. التفتت لطلال ينزل من سيارته وجاي عندهم ..
خافت مروة و على طول فتحت الباب ودخلت وقالت : جوجو بسرعه بسرعه امشي طلال ياي عندنا ..
الجوري ارتبكت : هاااااه؟ طلال ؟ وينه؟
قطع كلامهم طلال يدق دريشة الجـوري بعصبية .. التفتت عليه الجـوري بخــوف .. قررت تطنشه وتمشي .. بس هي خايفة من شي ثاني ..
خايفة من الشخص المجنون اللي معاهم >>> ريان ..
مروة : جورييييي يلا بسرعه امشي ماعليج منه ..
توها بتتحرك .. التفت لريان ينزل من سيارته ونظراته كلها عصبية ..
الجـوري بتصيح : مروووة خايفة ..
مروة مو فاهمة : ماعليج منه جوري امشي بسرعه ..
التفتو ثنتينهم ع الصوت جنبهم ..
طلال : ها شرفت يا روميو زمانك ..
ريان للحين ماسك اعصابه الفلتانه : من تكون انت؟
طلال : هه .. يسألني من اكون .. يدق الدريشة ع الجوري اللي كانت ترتجف من الخوف والدمعه بتطيح : خبريه .. خبريه من اكون .. حسبالج ما وراج احد وبتلعبين ع كيفج ..
ريان بعصبية يمسكه من قميصه ويلفه عنده : انه اكلمك .. كلمني اهني ماعليك منها .. خل كلامك مع الرياييل موب تستقوي ع البنت ..
مروة خايفة وبتصيح : الجوري شصاير منو ذا؟
الجوري تبجي وفتحت الدريشة : الله يخليكم كل واحد يمشي .. مانبي مشاكل ولا فضايح اهني ..
طلال يصرخ عليها : اي فضايح و انتي فاضحتنا من زمان الله ياخذج .. ياللي ما تستحين ..
ريان فار دمه لهالكلام اللي يسمعه من هالتافه وصفقه كف وقال: تخسي الا انت يا واطي .. فيك خير تكلم بعد عنها بكلمه ثانية ..
طلال عصب ومسك ريان من قميصه ويبي يضربه : انت يالحقير تمد يدك علي ما كفاك اللي تسويه معاها ..
الجـوري تصرخ : طلال لااااا اتركه ..
ريان وقف يطالع الجوري وطلال وقال بهدوء : يعني انت طلال؟ والله وجيت عندي بريولك .. ومحد بيفكك مني .. من زمان و انه انتظرك ..
و انقض عليه مثل الاسد و اخذ يضرب فيه بكل قوته ..
خصوصا ريان جسمه قوي ومعضل ويشيل حديد ولااا يلعب ملاكمة كمان .. شي طبيعي بيكسر طلال وبيقتله بين يدينه .. وخصوصا انه قاعد يضربه بجنوووون .. جنون الحب والغيرة .. اعمت عيونه عن كل شي ..
الجوري مايته من الصياح تحاول تبعدهم : الله يخليك ياريان خلااااااااااص .. تكففففى ذبحته .. اتركككككككككه ..
مروة جنبها تصيح : الجـوري تكفين قولي لي شصاير .. جوفي الناس تجمعت ..
الجـوري مو عارفة شتسوي و اهي تجوف طلال الدم يطلع من كل مكان بجسمه .. وريان مو تاركه ابد وشكله ناوي يقتله ..
راحت الجوري جنب ريان مسكت يده وتصرخ عليه : ريااااااااااان خلااااص ذبحته ..
تدخلو اللي واقفين هناك و بالزوور قدرو يفكونهم عن بعض ..
طلال خلاص طاح ع الارض اغمى عليه ..
شرطة المجتمع كانو واقفين هناك والتفتوو حق التجمع من بعيد ووصلو يركضون بس كانو متأخرين ..
لقو طلال طايح بالارض وريان الناس ماسكته وتبعده عن طلال ..
الشرطي مسك ريان وقال : تفضل معانا .. ( يكلم اللي معاه ) اتصلو بالاسعاف بسرعه ..

====================

المصدر: منتدى الخليج

قـائـمـة الأوسـمـة · #2

الــ ج ــزء الثــانــي

شرطة المجتمع كانو واقفين هناك والتفتوو حق التجمع من بعيد ووصلو يركضون بس كانو متأخرين ..
لقو طلال طايح بالارض وريان الناس ماسكته وتبعده عن طلال ..
الشرطي مسك ريان وقال : تفضل معانا .. ( يكلم اللي معاه ) اتصلو بالاسعاف بسرعه ..
الجـوري تصيح ومنهارة مو عارفة شتسوي ..
تطالع طلال اللي طايح بالارض وتطالع ريان اللي ياخذونه ومو مصدقه ..
الجــوري تصيح : ريان لاااا .. الله يخليكم لا تاخذوونه ..
ريان منزل راسه ويمشي بس كان بداخله غضب يحس للحين مافرغه في هالطلال !!
ريان مجنون شي اسمه الجــوري .. مستعد يذبح الناس كلها عشانها ..
اهو موب راعي مشاكل ولا هالسوالف .. بس اي شي يتعلق بالجوري مستعد يسويه ..
تفرقو الناس .. و الجوري قعدت ع الارض جنب سيارتها منزلة راسها بين ركبها وغطية ويهها بيدينها تبجي ..
مروة نزلت لها ع الارض وهي خايفة بقوووة .. خصوصا لما تطالع طلال وحالته ..
مروة تسمك الجـوري : جوري انا خايفة ..
الجـوري تبجي وتمسـك يدهـا : و انا بـعــد ..
شوي بس ووصل الاسعاف و خذو طلال .. والجـوري صاده بويهها ما تبي تجوووفه ..
مروة ترتجف وتطالعه : الجوري .. تهقين مات؟
الجوري الفكرة ارعبتها وخلتها تنتفض وقالت : لالالالالا .. شنو مات .. مامات ..
مروة : يلا الجـوري قومي .. الناس كلها راحت .. قومي نروح البيت ..
الجـوري وقفت على طول : ريولي ما تشيلني شلون بوصل البيت ..
مروة تمسكها : يلا حبيبتي دخلي السيارة .. هدي انتي بس و ا ذكري الله ..
دخلت الجوري السيارة و اهي ترتجف و الف فكرة وفكرة في بالها ..
ركبت السيارة ومشووا .. طول الطريق ثنتينهم ساكتين ..
الجـوري بخوف : تهقين بيحبسونه في السجن ؟
مروة تلتفت عليها : من؟
الجـوري بحزن : ريان ..
مروة : من ريان؟ هذا اللي ضرب طلال؟
الجـوري تهز راسها بحزن : ايه ..
مروة : الجوري منو هذا؟ وشسالفته ؟ وليش تهاوشو جذي؟
الجـوري قلبها يدق .. خلاص انكشف كل شي ..
الجـوري : بعدين افهمج .. يلا انزلي وصلنا ..
نزلت مروة بحيرة .. ودخلو البيت ..
مروة : الجوري .. انتي قلتي بتييبين الغدا .. امي اللحين بتسألنا ..
الجـوري وقفت مكانها تفكر : مروة انه مالي خلق ابرر لأمي شفيني اللحين .. انتي قولي لها الجوري تعبانه شوي راحت تنام ... و انتي اتصلي في المطعم اطلبي لكم غدا ..
صعدت جوري لغرفتها .. اما مروة وقفت مكانها محتارة وراحت سوت اللي قالته لها اختها..
**
وقفت ام تركي بصدمة : ريااااااااان؟؟؟ لييييش؟؟
تركي وهو يسكر التلفون بحيرة : والله مادري يمه .. بروح اشوف شصاير ..
ام تركي : يا ويلي عليك يا وليدي .. ريان موب مال هالسوالف .. روح يمه تكفى وطمنّا عليه.
بدور تمسك ام تركي : خلاص خالتي ان شاء الله خير .. اكاهوا تركي رايح و ان شاء الله بيطمنج .. انتي ارتاحي بس ..
ام تركي تقعد ع السوفا : الله يسمع منج يا بنيتي ..
راح تركي فوق لغرفته يبدل ملابسه .. لحقت وراه بدور ..
تركي واقف جدام المنظرة يضبط شماغه .. وبدور وراه : تهقى يا تركي وش مسوي؟
تركي يلتفت عليها : والله مادري علمي علمج .. بس ريان موب حق مشاكل ولا عمره سوى شي .. بروح و الله يستر ..
بدور : الله وياك حبيبي ..
تركي يلتفت لها بعد ماكان رايح وقال بخبث : قلتي شنو؟ ياحلوها منج بس ..
بدور تضحك بحيا وتقول : يلا تركي موب وقتك اخوك هناك ينتظرك يلا لا تتأخر عليه ..
تركي : ان شاء الله يلا عن اذنج ..
بدور : الله وياك ..
**
بقسم الشرطة .. كانو توهم خلصوا تحقيق مع ريـان ..
اخذه الشرطي يرجعه للتوقيف .. توه طالع معاه من غرفة الضابط الا تركي بيدخل .. انتبه لريان وراح جنبه ..
تركي بخوف : ريان وش فيه ؟
الشرطي مسكه : لو سمحت تفضل عند الضابط ..
مشى ريان مع الشرطي وتركي يطالعه بحيرة وخوف .. ودخل عند الضابط
تـركي : السلام عليكم ..
الضابط : وعليكم السلام تفضل ..
تـركي : اخوي انا جيت عشان ريان اللي طلع من شوي .. انتو اتصلتو فيني .. خير عسى ماشر؟ وش مسوي؟
الضابط : هذا اخوك؟
تـركي : أي اخوي .. هذي اول مرة يدخل فيها مركز شرطة .. انا مستغرب .. شصاير ؟
الضابط : اخوك تضارب مع شخص .. ماعرف عنه شي هالشخص بس وصلني ان اسمه طلال .. و اخوك ضرب الريّال ليما اغمي عليه .. و اهو اللحين بالمستشفى .. ننتظر التقرير الطبي عشان نقدر نجوف الموضوع ونتصرف ..
تـركي مستغرب: اخوي ريان؟ ( نزل راسه موب عارف شيقول ) طيب واللحين ؟
الضابط : مثل ما قلت لك .. اخوك بيظل عندنا موقف .. ليما نحصل ع التقرير الطبي بحالة المجني عليه عشان نجوف وش نقدر نسوي له ..
تـركي : طيب من هالشخص؟ ما تعرف اسمه كامل؟
الضابط يهز راسه : للاسف لا ..
تـركي : ومتى راح يوصلكم التقرير الطبي ..
الضابط : والله خلال ساعه بس ..
تـركي : ماشي انا راح انتظر اهنيه ..
الضابط : براحتك ..
**

وصل بو طلال يركض ومعاه ام طلال وبنته غزلان ..
وصل للدكتور وقال له بسرعه : طمني طلال شلونه؟
الدكتور مبتسم : لالا طلال ولدكم هذا بطل .. على الضرب اللي تعرض له الا انه الحمد لله بخير .. اهو بس فقد الوعي نتيجة الدم اللي كان ينزف منه بغزارة .. لكن الحمدلله وقفنا النزيف وعوضناه بدم اللي فقده .. لكن عنده كسر بيده وشوية رضوض وكدمات تروح مع الوقت ..
بو طلال تنهد براحه : الحمد لله .. وينه اللحين نقدر نجوفه.؟
الدكتور : أي تفضلو .. بس ياريت بسرعه علشاان الشرطة جايين يحققون معاه وياخذون أقواله بالموضوع ..
بو طلال : ان شاء الله ..
مشى عنهم الدكتور .. و راحو يركضون لي غرفته ..
دخلت اول شي ام طلال وراحت بسرعه لعنده: طلال يمه منو مسوي فيك جذي .. ( تحظنه ) طمني عليك يمه ..
طلال يتألم شوي من ضمة امه : آآه يمه ..
ابتعدت عنه بسرعه وقال بو طلال : شوي شوي ع الولد عورتييييه ..
ام طلال تبجي : شسوي من خوفي عليه .. ( تلتفت على طلال ) ها يمه تتألم؟ يعورك شي؟
ابتسم طلال بتعب على امه وقال بشوية صعوبة : لا يمه انا بخير ..
غزلان تبعد امها : يمه خلينا نجوفه .. ( قربت منه وهي تطالعه حست نفسها بتبجي ) طلال من مسوي فيك جذي؟
طلال لف راسه الجهة الثانية وهو يتذكر اللي صار .. وفيه قهر بداخله .. ماكان قهره على ريان كثر ماهو منقهر من الجـوري ..
بوطلال : طلال و انا ابوك خبرنا شصاير ( بقهر ) راح انتقم لك من اللي سوى جذي وبخليه بالسجن ما يطلع طول عمره ..
طلال ضحك باستهزاء : انا مابيه بالسجن .. انا ابيه برا عشان اتفاهم معاه بطريقتي .. السجن ما بيسوون له شي ..
بوطلال : طلال يبه لا تتهور .. شوف شصار فيك .. خل الشرطة تتفاهم معاه .. هذا شكله واحد متوحش ..
طلال سرح شوي يفكر .. ريان موب متوحش .. باين عليه .. بس من كثر حبه لها سوى اللي سواه .. اااخخخخ لكن وين بتروحون مني انت معاها ..
غزلان تمسك يده بخفة عشان ما تعوره : طلال .. وين سرحت ..
طلال : ولا شي ..
دخل الدكتور عليهم وقال : لو سمحتوو .. تفضلو .. لان الضابط ياي يبي يكلم طلال ..
طلعو كلهم و اخرهم بو طلال اللي التفت على طلال وهو خايف وش يفكر فيه وقال له : ماوصيك يبه ..
اتبسم طلال مجاملة لأبوه .. وطلعو ..
دخل الضابط : السلام عليكم
طلال يعدل نفسه عشان يقعد بس حس بشوية ألم : اااه .
الضابط : لالالا استريح خلك مكانك ... طيب اخ طلال .. ممكن تقول لي وش صار معاك بالتفصيل ..
طلال يبتسم ابتسامة خبيثة طافت ع الضابط : احم .. الله يسلمك كنت ماشي بالسيارة وصدفة شفت بنت عمي بنفس الشارع وكانت رايحة المدرسة تاخذ اختها .. وكنّا قريب من المدرسة .. و انا من زمان ما شفت بنات عمي .. قلت اسلم عليهم .. مشيت جنبها ليما وصلنا المدرسة .. وطول الطريق كنت ملاحظ سيارة كانت وراها .. وصلنا المدرسة وكان للحين ورانا .. وقف سيارته قريب بنت عمي وكان قاعد يراقبها .. انا شكيت فيه .. وكلمته وسألته .. لكن اهو تطاول علي بالكلام ولما رديت عليه .. مد يده علي .. بس هذا اللي صار ..
الضابط : اممممم ما عندك كلام ثاني تبي تقوله؟
طلال : اممم لا هذا اللي عندي ..
الضابط : طيب ممكن تعطينا رقم بنت عمك و اسمها وعنوانها عشان ناخذ اقوالها؟
طلال مرتبك .. للحين ما صار خسيس لهالدرجة عشان يدخل بنت عمه مركز الشرطة .. بس فكرة الانتقام للحين تدور بباله وقال : اوكيه سجل عندك ..
اخذ الضابط اسم الجـوري ورقمها وطلع من عند طلال ..
ضحك طلال وقال بخبث : لا تخاف يا حبيبي كلها شهر بس نعذبك بالسجن ونعذب بنت العم معاك .. عقب شهر راح اتنازل و اخليك تطلع .. هه موب كرم مني .. الا لاني أبي اتفاهم معاك شخصيا .. لان السجن ما يهمني .. هذي بس قرصة اذن لك يا ريان هه ..
**

بعد ما حكت الجوري السالفة كلها لأختها مروة اللي كانت بتموووت من الفضول وتعرف وش القصة ..
الجـوري بحزن : واللحين عرفتي كل شي؟
مـروة للحين بحالة ذهول : وسوى كل هذا عشانج ؟
الجوري تبتسم بحزن : ريان مستعد يخرب الدنيا كلها .. بس عشان ما يزعلني .. بس هذا الشي ماحبه فيه ..
مروة : لييييش؟ بالعكس المفروض تستانسين..
الجـوري : اذا شي فيه مضرته .. انا مابيه .. شوفيه شلون خذوه الشرطة والله العالم شبيصير ( بدت تبجي ) ..
مروة حظنت اختها : لا حبيبتي ان شاء الله بيطلعونه لا تخافين ..
الجـوري تمسح دموعها وتشهق : بدون ريان اضيع ..
مروة تطالعها : لهالدرجة يا الجوري؟
الجـوري تطالع بعيد وكأنها تتذكر : ريان يا مروة وقف معاي بكل شي .. سنتين و اهو شايل عني كل همومي .. وشايل الحمل معاي .. ( تلتفت على مروة ) ترى كل شي يستوي بهالبيت .. ريان اهو اللي سواه .. واليوم كان جاي ياخذ سيارتي للكراج لان يبيلها شوية تصليح .. و الا بذمتج انا وش يدخلني كراجات ؟ .. ( خنقتها العبرة ) كل شي احتاجه اهو يسويه لي .. ما حسسني ولا يوم انّي بنت ضايعه بهالدنيا وتبي ريّال يسندها .. لأنه كان السند لي بكل شي .. انا بنت ضعيفة ما تقدر ع مسؤولية بيت وعائلة .. وتعرفين مصاعب الدنيا .. بس ريان كان لي الاخو والابو والزوج وكل شي احتاجه .. شال معاي هالمسؤولية كلها .. اااااه واللحين ماني عارفة شسوي له عشان ارد الجميل .. الا قطيته بالسجن ( قعدت تبجي ) ..
مروة تأثرت وايد وتوها كانت حاسة بحجم المسؤولية اللي شايلتها اختها والتحمل اللي تحملته عشانهم ..
حظنت اختها وقعدت تهديها : خلاص يا الجـوري .. اهدي حبيبتي ..
سكتوا شوي .. عقب قالت مروة : جـوري ليش ما تتزوجينه؟ خلاص ماله داعي تظلون جذي.. شوفي شصار لكم اليوم ..
الجـوري بإحساس بالذنب : ياما سببت له مشاكل .. بس اهو كان يتحملني ومع هذا ما يضغط علي بطلب الزواج .. الا بالعكس كاتم بقلبه الحسرة . بس انا حاسة فيه .. في كل مرة يكلمني فيها بالموضوع ارفض و أأجل .. عشانكم يا مروة (تمسح ع راسها ) مابي اترككم .. مابيج يا مروة تعيشين الحياة اللي عشتها ويصير فيج اللي صار فيني .. وهو مستعد ينتظرني .. شوفي يا مروة من يقدر يتحمل كل هذا ؟ ريان اللحين عمره 27 سنة وللحين ما تزوج .. ينتظرني .. احيانا احس نفسي انانية .. يحق له يتزوج ويشوف حياته .. لكن من اقول له هالكلام يزعل علي لدرجة انه اسبوع ما يكلمني زعلان .. بس شسوي اسكت ..
مـروة متأثرة وايد : خلاص يالجوري تزوجيييييه .. مابي يصير فيج كل هذا عشاننا ..
الجـوري : لا يامروة .. ماقدر ..
قاطع كلامهم صوت موبايل الجـوري يرن .. ركضت بسرعه حسبالها ريان .. لكنها خافت يوم شافت رقم غريب .. ردت بخوف : الوو
الطرف الثاني : مرحبا .. الاخت الجوري؟
الجـوري بخوف : أي نعم اخوي ..
الطرف الثاني : معاج الشرطة .. ممكن اختي تجين عندنا المركز نبي ناخذ اقوالج بخصوص الموضوع اللي صار اليوم ؟
الجـوري ترتجف: ريان وينه؟
الشرطي : اختي ريان عندنا .. بس نبيج تيين ناخذ اقوالج ..
الجـوري بخوف : ان شاء الله اييكم اللحين ..
الشرطي : ياريت ما تتأخرين .. مشكورة .. مع السلامة ..
الجـوري : الله يسلمك ..
سكرت الجوري التلفون ونزلت ع الارض تبجي .. ريولها ما تشيلها ..
راحت جنبها مروة خايفة : الجوري شفيج ؟ من متصل؟
الجوري تحظن مروة وتصيح : مركز الشرطة يبوني ارووح ..
مروة شهقت بخوف وقالت : بياخذوووونج الجوري؟؟؟؟
الجـوري منزلة راسها : لا بس يبون شهادتي بالموضوع ..
مروة خايفة : يعني بترجعين بعدين؟
الجوري تبتسم لها : أي برجع حبيبتي لا تخافين .. خليني اقوم البس و اروح ..
قامت الجوري بسرعه بدلت ملابسها ولبست توب أسود .. وتنورة بيضا واسعه فيها تطريزات بالأسود وشيلة بيضا ..
الجـوري : يلا حبيبتي ديري بالج ع امي .. انا طالعه .. و اذا صحت من النوم خبريها اني رحت مشوار وراجعه ..
مروة بخوف : لا تتأخرين الجوري الله يخليج انا خايفة ..
الجـوري : لا حبيبتي ماراح أتأخر .. يلا مع السلامة ..
مروة : الله وياج ..
**
ريان قاعد بالسجن ع الارض ومسند راسه للجدار ..
المكان مليان شباب وكلهم يكلمون بعض .. اللي معصب واللي حزين .. بس اهو اللي ساكت من دخل ليلحين ..
يفكر في الجـوري وشلون حالها اللحين .. ووش بيسوي لها طلال .. اكيد بيقول للكل عن الموضوع ..
تنهد وغمض عيونه يفكر بمصيره اهنيه .. مستحيل طلال يتنازل عشان يطلعني .. باين عليه نذل وحقير .. مستحيل..
قلبه ماكله على اهله .. خايف على امه و ابوه اذا سمعو بوجوده اهني ..
شغله ؟ راح يفصلونه .. و هو ما صدق يحصل شغل ويستقر فيه !!
نزل راسه بين ركبتينه وهموم الدنيا كلها جاثمة على صدره ..
ما له الا الصبر ويجوف شنو ربي كاتب له ..

بالطرف الثاني من مركز الشرطة .. وصلت الجـوري وكانت خايفة .. اول مرة تدش مراكز شرطة ويصير لها مثل هالموقف .. وحتى لو صار لها هالشي من قبل .. راح يكون ريـان بجنبها ويدخل معاها .. بس اللحين ريان بعيد عنها ..
دخلت المركز ودلوها ع غرفة الضابط .. دخلها العسكري ..
الجـوري بخوف : السلام عليكم ..
الضابط : وعليكم السلام .. تفضلي اختي ..
الجـوري تقعد : شكرا .. معاك الجـوري .. طلبتوني من شوي ..
الضابط يطالع الاوراق اللي جدامه : امممم ( رفع راسه لها ) .. بما انج يا اختي كنتي طرف بالمشكلة اللي صارت بين ريان وطلال .. لابد اننا نسمع اقوالج ..
الجـوري مرتبكة : انـ .. ان شـ...ـاء الله ..
الضابط تفهم وضعها : لا تخافين اختي ان شاء الله ما راح يصير الا الخير .. تفضلي قولي كل اللي شفتينه اليوم .. و اهم شي الصراحه .. هالشي بيساعدنا وبيساعدكم ..
الجـوري بغصة : حضـرة الضابط انا بشرح لك كل شي اعرفه .. انا و ريـان كنـا متفقين ع الزواج .. ويعني بيننا معرفة لكن جدا بسيطة .. وبهالفترة نرتب للزواج .. وشي طبيعي بتكون بيننا مكالمات ومعرفة .. لكن المدعو طلال ولد عمي .. معارض هذا الشي .. لكن اهو ماله حق .. انا تجاوزت السن القانوني ومسؤولة عن نفسي .. طبعا كل هذا ماله اهمية .. بس عشان تعرف طبيعة العلاقة بين ريان وطلال ..
الضابط يهز راسه : فاهم .. كملي ..
الجـوري بجرأة غير معتادة : اليوم طلعت من الشركة اللي اشتغل فيها .. وطبعا الاخ طلال كعادته دايما يلاحقني ويتعمد يوقفني بأي مكان .. يبي يثنيني عن قرار زواجي .. بس انا كنت متفقة مع ريان ان مجرد ارجع البيت يجي هو ياخذ سيارتي للكراج لانها محتاجة شوية تصليحات .. وطبعا مشينا من عند الشركة وهو كان وراي .. و انه ما انتبهت ان طلال بعد كان وراي .. وصلت المدرسة عشان اخذ اختي قبل ما اروح البيت .. لقيت طلال نازل من سيارتي وجاي لعندي .. ريان التفت له ونزل من سيارته بعد عشان يجوف شصاير .. الاثنين ماكانو يعرفون بعض .. وكل واحد منه كلمة .. وطلال استفز ريان بالكلام .. ليما صار اللي صار ..
الجوري قلبها يدق للكلام اللي قالته .. بس ماكان بيدها غير انها تقول الصراحه ..

الضابط : طبعا اقوالج متطابقة مع اقوال الاخ ريان بدون زيادة او نقصان .. لكن الاخ طلال يقول غير جذي .. كان يقول انه مار جنب المدرسة بالصدفة وشافج وحب ينزل يسلم عليج لكنه لاحظ الاخ ريان يلحقج ويتحرش فيج فكان يدافع عنج بما انه ولد عمج ليما تطاول عليه ريان وضربه ..
الجـوري بقهـر : طبعا لا يا حضرة الضابط .. طلال كان لاحقني متعمد .. وريان ماكان يتحرش فيني ابد .. كان يمشي وراي عشان ادله البيت وياخذ السيارة ..
الضابط لمس الصدق بكلامها و انفعالها : هدّي اختي .. طبعا كلامج انتي و الاخ ريان صحيح.. بس هذا ما يمنع ان احنا نتخذ الاجراء اللازم ضد الاخ ريان .. لان التقرير الطبي اللي عندي يثبت تعرّض طلال للضرب المبرح مما ادى الى نزيف حاد وكسور ورضوض بجسمه .. و في هالحالة ينحكم ع الاخ ريان السجن لمدة ثلاثة شهور بسبب تعرضه لشخص بالضرب .. لكن في حالة تنازل الاخ طلال عن القضية .. راح يطلع ريان بكفالة ..
الجـوري توقف بصعـوبة ومو مصدقة : لا ريــان لا .. ( ماقدرت تكمل كلامها وطاحت عليهم)
الضابط قام بسرعه جهتها وهو ينادي : يا عسكري بسرعه تعال .. عطنا ماي ..
راح الضابط عند الجوري بسرعه ورفعها ع الكرسي و اخذ الماي من العسكري ورش ع ويهها .. شوي شوي فتحت عيونها الجـوري وهي تبجي وتقول بصوت متقطع : لا ريان .. لا تسجنونه .. اسجنوني بداله .. ريان ماله ذنب .. انه اللي .........
قاطعها الضابط : خلاص اختي اهدي خلاص .. ان شاء الله كل شي ينحل ..
الجـوري تمسح دموعها وتقول بضعف : وش نقدر نسوي ياخوي .. تكفى ريان لا ينسجن..
الضابط كسرت خاطره وقال: مابيدنا شي اختي .. الا اذا قدرتي تقنعين ولد عمج بالتنازل ..
الجـوري سكتت شوي وقالت : اقدر اجوف ريـان؟
الضابط : اهو بصراحه لا .. بس عشانج بناديه ..
الجـوري : تسلم ..
الضابط : يا عسكـري .. هات ريـان ..
بعد شوي دخل العسكـري ومعـاه ريـان .. شهق ريان لما جاف الجـوري .. والجوري وقفت وراحت جنبه تبجي : شلونك ريان انت بخير؟
ريـان : انتي شيابج اهني؟
الجـوري منزلة راسها : اهم نادوني عشان ياخذون اقوالي .. ( رفعت راسها له ) ريان انا اسفة والله ماكان قصدي اسبب لك كل هذا .. ( ظلت تبجي ) ..
ريـان بصوت واطي وكله حنيّة : تعرفيني ماقدر على دموعج الله يخليج لا تبجين ترى اضعف معاج .. خلاص لا تبجين ..
الجـوري تمسح دموعها : ان شاء الله .. ريان .. انا بكلم طلال وبحاول فيه عشان يتنازل عن القضية ويطلعونك ..
ريان بسرعه : لا .. طلال لا .. لا تكلمينه ..
الجـوري : عشانك ياريان .. ما يصير جذي تظل اهني .. اهلك يحاتونك اكيد ..
ريـان : محد راح يحاتي .. انا كلمت اخوي تـركي من شوي وخليته يطمن الاهل ..
الجـوري منزلة راسـها : ريان تكفى .. خلني بكلم طلال .. ما اتحمل اخليك اهني ..
ريان يتنهد : براحتج يا الجـوري .. بس لا تاخذين وتعطين معاه وايد .. هالواطي .. انا اسف يا الجـوري .. سببت لج مشاكل واللحين الحقير بيفضحج وطبعا بيقول كلام ماصار .. اعرف هالاشكال زين ..
الجـوري : لا ياريان لا تقول جذي .. انا ما همني احد بس خايفة عليك ..
ريان يبتسم لها : تسلمين حياتي .. يلا روحي البيت لا تظلين اهني .. ومابيج تيين هالمكان مرة ثانية .. مفهوم؟
الجـوري : المكان اللي انت فيه مستحيل ما اجيه .. عن اذنك ريان تحمل بحالك ..
طالعته بنظرة حزينة وقلبها يتقطع ومشت قبل لا تنزل دموعها ..
غمض عيونه ريان وهو ياخذ نفس بقوووة .. واخذه العسكري مرة ثانية لمكانه ..

طلعت الجـوري من مركـز الشرطـة وهي تحاول تخفي دموعـها .. توهـا طالعـة الا تلاقـي في وجهها تركـي اخو ريـان .. طبعا اهي ماشافته ولا مرة بس شافته بالصور ..
وقف يطالعها وهو كان يعرفها انها هي الجوري ..
تقرب منها وبعيون كلها شرار : انتي السبب اللي وصلتي اخوي ليهني .. اخوي ماله بهالسوالف .. لكن انتي اللي لاعبة بعقله .. الله ينتقم منج بس .. الله ياخذج ويفكنا منج .. من عرفج و اهو كل يوم بمشكلة .. بسبتج .. لا بارك الله فيج ..
الجـوري تبجي : انا والله ماسويت شي .. مالي ذنــ.......
يقاطعها تركي : بس سكتي .. لج عين تتكلمين بعد ..
مشى عنها ودخل لمركز الشرطة مرة ثانية .. راحت الجـوري سيارتها تركض وهي تبجي .. دخلت السيارة ونزلت راسها ع الستيرنغ وهي تبجي : انه السبب .. انه اللي دخلته السجن ..
حاولت تهدي نفسها شوي .. عقب شوي اخذت موبايلها ودقت على اختها مـروة ..
مروووة : هلا جوجو .. ها شصار ..
الجـوري بصوت متقطع من البجي : مـروة جهزي حالج بمرج اللحين بنطلع ..
مروة : ليش؟ وين بنروووح ؟ شصار؟
الجـوري : مروة الله يخليج لبسي بسرعه بمرج ..
مروة : ان شاء الله ..
الجـوري : أي مروة .. اذا امي سألتج قولي لها ان انه باخذج المكتبة تاخذين لج اغراض للمدرسة .. زين؟
مروة : ان شاء الله يلا باي ..
الجـوري : باي ..
**
بالمستشفى عند طلال ..
وقف بو طلال بعصبية : انت من صجك تتكلم؟
طلال يطالع ابوه ببرود : ايه ..
بوطلال يرص ع اسنانه بقهر : فضحتنا اللي ما تستحي .. هذي ماعندها ريال يوقفها عند حدها لكن انه اللي بعرف شلون اتفاهم معاها و اربيها من جديد ..
غزلان بغرور وكره : ايه هذي ماعندها ريال يربيها .. مربية روحها بروحها .. شي طبيعي بتطلع جذيه ..
ام طلال بحقد اكثر : ويه شدعوه هالام اللي عندها بتعرف شلون تربيها .. الله يخلف بس..
طلال يطالعهم ومو عاجبه الكلام .. هو بداخله يعرف ان الجوري نظيفة ومربية ولولا حاجتها لرجال بحياتها يساعدها ماكانت سوت جذي .. وباين عليهم يحبون بعض صج ..
لكن اهو اعمته الغيرة من ريان والحقد عليه .. اضافة الى انه واحد مدلّع متعود كل شي يبيه يحصل عليه ولو بالقوة .. ويحس كل شي يبيه فهو ملكه .. عشان جذي يتعامل مع الجـوري بهالطريقة ..
قطع كلامهم صوت دق خفيف ع الباب ..
بوطلال : تفضل ..
الجـوري دق قلبها لما سمعت صوت بوطلال موجود داخل .. اكيد عرف خلاص اللحين بيفضحونها اهني ..
طالعت اختها مروة وهي خايفة .. مروة هزت لها راسها يعني ادخلي ..
فتحت الجـوري الباب بيد ترتجف ودخلت تطالعهم وقلبها يدق بقوة : الـســ.......
ما مداها تكمل سلامها .. الا عمها يجي لها مثل المجنون ويمسكها من ذراعها ويصرخ عليها: ياللي ما تستحين فضحتينا بسوالفج .. يا عديمة التربية يالواطية يالحقيرة .. لكن اذا اهلج ماربوج ولا عندج حد يربيج انا بعرف شلون اربيج ..
الجـوري تسحب يده من يده بقوة وتصرخ في ويهه : احترم نفسك انا متربية احسن تربية .. مانبي بحاجة لك ..
ما استوعبت الا كف جاينها على ويهها ..
شهقت مروة وراحت مسكت اختها ...
بوطلال : لا وترادديني بعد ياللي ما تستحين ..
راح جنبها مرة ثانية بيضربها .. لكن مسكته بنته غزلان وقالت : يبه لا توصخ يدك بهالاشكال خلها تولي احنا ما نتشرف فيها اصلا ..
مروة : احنا اللي ما نتشرف فيكم .. اتركونا بحالنا ..
ام طلال : ويييييييه مابقى الا اليهال بعد يتكلمون .. يلا سدي حلجج اجوف ..
بوطلال : جاب سكتي انتي و اختج .. وحسابي معاكم بعدين ..
الجـوري تلتفت على طلال : قوم يا ريّال زمانك .. لو بس تعرف تستقوي علي .. و ما تعرف تدافع عني .. وقت اللي تبيني تعرف شنو تسوي واللحين قاعد مكانك ..
غزلان : ويييييييع .. تخسين اخوي يبيج عقب سواد ويهج ..
مروة منقهرة : احترمي نفسج لا تغلطين على اختي .. اختي اشرف منج ..
غزلان : سكتي سكتي يالياهل .. محـ....
طلال يقاطعهم : بس خلاص سكتو .. وين قاعدين .. ( يلتفت على ابوه ) يبه الجـوري ما سوت شي غلط .. و اهي اللحين جاية تتطمن علي ..
مروة تضحك بصوت واطي وتساسر اختها : وايد واثق نتطمن عليه..
ام طلال : وانت للحين تدافع عن هاللي ما تستحي ..
الجـوري تطالعهم عقب تكلمت بخوف : طلال ..
طلال التفت جنبها ..
الجـوري منزلة راسها : اول شي ما تجوف شر الله يقومك بالسلامة .. اللي صار مالي يد فيه وصار غصبا عني .. وثاني شي ابي منك طلب ..
طلال بحيـرة : قولي ..
الجـوري بتردد : تكفى طلال .. تنازل عن القضية .. حرام ريان بيقطونه بالسجن .. عشاني يا طلال ..
بوطلال صرخ في ويهها : انتي صج ما تستحين .. وبكل قواة عين بعد ياية تقولين هالحجي .. ( مسكها من يدها يسحبها بره الغرفة ) هاللي ناقص بعد ولدي ينطق وتبينه يتنازل .. روحي اقول ذلفي لا بارك الله فيج ولا في ولد الحرام ..
مروة تمسك يده وهي تصيح : اترك اختي .. خلها ..
دخل عليهم دكتور كان مار بجنب الغرفة وسمع الازعاج : لو سمحتو اذا عندكم مشاكل حلوها برة المستشفى .. تراكم ازعجتو المرضى ..
الجـوري مسكت يد اختها والتفتت على طلال تطالعه بنظرة رجا .. وعقب نزلت راسها ومشت اهي و اختها و طلعو بره الغرفة ..
طول الدرب و اهي حابسة دموعه .. وصلو للسيارة ودخلت و ع طول نزلت راسها وقامت تبجي ..
مروة تقطع قلبها ع اختها : الجـوري حبيبتي خلاص لا تبجين ..
الجـوري تبجي : وش تبيني اسوي .. ريان خلاص .. بيسجنونه ..
مروة : طيب هي الا ثلاث شهور مو وايد .. بتعدّي بسرعه ..
الجـوري : هذا بالنسبة لج انتي .. بس بالنسبة لي .. بتم اتعذب طول هالأشهر لاني السبب في هالشي .. ودمرت مستقبله .. شبيقولون عنه الناس .. راعي بلاوي وسجون ؟ وشغله اللي بالزور حصله؟ و اهله ؟ وشذنب امه احسرها على ولدها مرمي بالسجن .. اااه يامروة وش بيدي اسوي تكفين خبريني ..
مروة قلبها تقطع ع اختها وحظنتها تهديها .. وش تقدر تسوي لها اهي الثانية؟
**
في بيت اهل ريان ..
تركي الكل يسأله عن الموضوع يبي يعرف شصاير بس تركي فيه قهر .. وده يقول .. لكن اخوه ريان محلفه ما يخبر اهله عن سالفة الجوري ووش صار بالضبط ..
بوتـركي : تـركي شفيك قول لنا شصاير؟ وليش اخوك انسجن ؟
تـركي منزل راسه يدور جذبة : تهاوش مع واحد وضربه .. والريّال ودوه المستشفى وتعور شوي .. عشان جذي قالو بيسجنون ريان 3 شهور ..
ام تـركي تشهق : ويلي على ولدي .. من صجك يا تركي بينسجن؟
بو تركي : خلينا نفهم شصاير .. ( يلتفت على تركي ) ليش تهاوش معاه ؟
تـركي : مادري صراحه ريان ماخبرني بكل شي .. بس قال ان بينهم خلاف من زمان و هالمرة تهاوشوا وريـان ماقدر يمسك اعصابه وتضاربو .. وخبرك تعرف ولدك ريان محد يقدر عليه .. فذاك الريّال مسكين اكلها .. وموب راضي يتنازل ابد ..
بو تركي : لا حول ولا قوة الا بالله ..
ام تركي تبجي : ويلي على ولديييي .. ودوني اجوفه تكفون ..
بوتركي : استهدي بالله .. اللي الله كاتبه بيصير .. واللحين جت الليل .. ان شاء الله بكرة كلنا نروح نشوفه ..
تـركي : عن اذنكم ..
قام تركي راح لغرفته فوق .. دخل ولقى بدور قاعده جدام المنظرة تعدل شعـرها ..
راح وراها ودخّل يده بين خصلات شعره وعفسه لها بحركة بسيطة ..
بدور تلتفت عليه : تركيييييييي .. ليش سويت جذي ..
تركي يقلد على صوتها بدلع : تركييييييي .. هههههه جذي احلى ..
بدور : تتطنز؟
تركي يبتسم لها بهبالة : لا ابد .. استخف دمي بس ..
بـدور : ولله ؟ ( لفت ويهها للمنظرة وقامت تعدل شعرها ) شصار على اخوك ؟
تركي ينسدح ع السرير ويقول بقهر : الله ياخذهااااااا ..
بدور تلتفت له بحيرة : منهي ذي؟
تركـي : هذي اللي انسجن عشانها ..
بدور : ماني فاهمة ..
تركـي : ريان الله يهديه يحب وحده مادري من وين يايبها لنا .. كل يوم يتمشكل مع ناس بسبتها .. واليوم متهاوش مع ولد عمها لان هو خبرني من قبل ان ولد عمها يبيها بس اهي ما تبيه .. واليوم شافه لاحقها وتهاوش معاها .. وتعرفين ريان مجنون فيها .. مادري شمسوية له .. وكل يوم له مشكلة مع ناس بسبتها ..
بـدور تفكر : يمكـن البنت مالها ذنـب يا تركـي .. و اخوك الله يهديه ما يمسك اعصابه ابد ..
تركـي بقهر : كله منها اهي السبب .. كل مشكلة يطيح فيها اكثر من الثانية ..
بـدور تقعد جنبيه : خلاص حياتي لا تزعل روحك .. اهو يحبها وراضي بكل اللي يجيه ..
تركـي بخبث : وش قلتي؟
بدور مستغربة : ما قلت شي .. قلت خله براحته معاها اهو راضي ..
تركـي : لالا اللي قبلها ..
بدور ببراءة تفكر : ماقلت شي ..
تركـي يغمز : عليناااااااا ..
بدور تضحك : هههههه والله ما قلت شي .. لا بجد وش قلت؟
تركـي : قلتي حياتي .. بجد انا حياتج؟ تحبيني؟
بدور بحيا تقوم عنه : اوووه تركي .. طلعت مني جذي عفوية ..
تركي حظنها من ورا : كل شي منج حلو يا حياتي ..
**