المفارق للشاعر حمد السعيد

 

المفارق للشاعر حمد السعيد

والله إني كنت ألوم اللي يضيق إن غاب خله ..
لين جربت المحبه والفراق وقلت توبه ..
لعنبو جد المفارق فيه هم وفيه ذله ..
أثر كل الحب لذه والفراق أكبر عيوبه ..
أمس فارقت الغلا ومفارق الخلان عله ..
والعلاج الوصل لاتبلش طبيب ولاحبوبه ..
الزعل هو سبة الفرقا يهز الحب كله ..
ليتني طولت بالي قبل لايعلن غروبه ..
وأهني اللي وسيع الصدر صدره وسع فله ..
غلطت الصاحب تجي وتروح ماهي بمحسوبه ..
سامح الله طبعي اللي لتغير يالعله ..
قاضباً خلك عزيز لين صارت لي عقوبه ..
ليش تحسب غلطة الصاحب على الصاحب مذله ..
ليش ماتحسب ميانه لو تجي عشرين نوبه ..
لاوربي كنت أحبه حيل مادورت زله ..
لاتشكك في غلاهـ ولاتساعد في هروبه ..
لايمي قبلك تعبت ألوم شعار المجله ..
وكنت مؤمن في مقولة أعذب الشعر الكذوبه ..
وأثر كلن في حياته له تجارب مستقله ..
وأنت لاتشره على مثلي وتبلى لك بحوبه ..
كان جابتك الحميه روح له تكفى وقله ..
لايخليني وإذا وده يخفف من ذنوبه ..
يستخير وله غلا قلب صدوق مايمله ..
فدوةٍ لك كل قلبي من شماله لي جنوبه ..
يوم قفى والخفوق يفوح عقبه فوح دله ..
وسط وقدرة واحدن عز الشتا والسهر دوبه ..
لاتقهوى بارده من برد فنجاله وزله ..
ثم قربها على جال الجمر وأرهى شبوبه ..
وين يدله هالخفوق وكل مايدله يتله ..
طاري اللي ياكثر ماتعبت رجلي في دروبه ..
لاطرى جريت له ونه من بلاده مستحله ..
مثل ماراحت بلادي مع شعارات العروبه ..
كل هاجوس يجيبه جعل شعري فدوةٍ له ..
واعذابي كل ماجابت لي الجبله هبوبه ..
مشغلن قلبي بحبه دون خلق الله من الله ..
هيه ياللي ممتلكني حسن وأسلوب وعذوبه ..
ماسمعت إن الخوي له بالخوي تسعين زله ..
وإنت طوف زلتي ياعل تفداك اللعوبه ..
صاحبي سيف الهجر لاصرت تقدر لاتسله ..
ماتظن ان العفو عند المقدره أكبر عقوبه ..
إيه أنا اللي كنت ألوم اللي يضيق إن غاب خله ..
بـــس جربت المحبه والفراق وقلت توبه ..

المصدر: منتدى الخليج