رصيدك في حياتك سمعتك مع طيبين الفال

 

رصيدك في حياتك سمعتك مع طيبين الفال

معوّض خير ياحيٍ تهقوى في الزمـان ومـال
سنينك لو رقيت بعدلها يطرحـك مايلهـا



تعلّم وإعرف إن الدرب قدامك سهـل وجبـال
جبال تطولها وجبـال بعيونـك تخايلهـا



ومعوّض خير ياحيٍ وردت الماء بدون حبـال
يطول بك الوقوف وشربة الماء ماتحصّلها



وقوفك عند راس البير مايسقيـك لـو فنجـال
ولاينفعك شوف الجمه اللي منـت طايلهـا



ومعوّض خير ياحيٍ خدعك من الرجال أشكال
تشوف أشكالها وتحطها أرفع من منازلهـا



تعلّم من زمانك لاتصير من أجهـل الجهـال
ترى في كل يوم تجيك عبـره لاتجاهلهـا



إذا ربي وهب لك عقل تلقى في الرجال رجال
تعرف اللي يطلّع قيمتـك واللـي ينزلهـا



ترى من بعض مايندي الجبين ويحرج الرجال
لياسـاق الميانـه فـي نفـوسٍ ماتقبّلهـا



ومهما شفت في صاحبك من نخوه وطيبة فال
ترى بعض السجايا كثرة الإلحاح يقتلهـا



معاريف الرجال ديون وديون الرجال ثقال
لياصرت متعافي ليش تغـرق فـي جمايلهـا


رصيدك في حياتك سمعتك مع طيبين الفال
رجال الطيب والمعروف بالمعروف عاملها


ولاتبدي بجاهك فـي مقـامٍ مايسـر الحـال
ولاتشفـع لنـاسٍ ماتنومسـك بفعايلـهـا

لياجاتك تعذّرهـا مـدام العـذر لـه مدخـال
ووقت الجد قول الها الصحيح ولاتجاملهـا

وخذ مني نصيحـه لاتصـدق كـل ماينقـال
يجرك للنميمه ليـن يطرحـك بحبايلهـا

يجيلك ناقـل النمّـات بهـروجٍ تغـث البـال
سوالف في قفاك وحظك أطيب يوم تجهلها

يبـرر بالحميـه والصداقـه شينـة الأفعـال
يجمّل صورته بعلومـه اللـي ماتجمّلهـا

ولو كانت حميه فيك رد المخطيه فـي الحـال
ولاكان إستمعها في قفاك وجـاك شايلهـا

ترى من جاب لك ودّى وهذي عـادة النقـال
يحاول يقتنص من فمك كلمه لأجل ينقلهـا

ومثل ماقال عندك راح عنك وعند غيرك قال
وزوّد عشر فوق الكلمه اللي كنت قايلهـا

تجنّب مجلسه لاتجلس إلا مع كريـم خصـال
تحمّل ميلته وإن ملـت ميلتـك يتحمّلهـا

ولاتصبر على الجار الردي لوهي ثلاث ليـال
تضرك جيرتـه لوكـان بيبانـك تقفلهـا

وبيع الدار بأول سومةٍ تعرض علـى الـدلال
ورزقك عند ربٍ كاتـب اللقمـه وكافلهـا

وبنتك لاتزوجها الردي لوهـو كثيـر المـال
تربيها على الطـالات وتشـوّه سلايلهـا

وكم من لاش يرمي خيبة إبنه فوق راس الخال
لوإن الخال من روس الرجال ومن دلايلها

ليامنك عرفت تميّـز الطيّـب مـن البطـال
وفادتك التجارب في الحياة وفي مسايلهـا

وكشفت الفرق مابين الصحيح وحيلة المحتـال
وتعلمت الفراسه في الوجيه اللـي تقابلهـا

بعد هذي ترى مالك غنى عن صحبة العقّـال
يدلونك بـرايٍ ينقـض الدعـوه ويفتلهـا

يقولون الرجال اللي سوالفهـم حِكـم وأمثـال
ليامن ضاعت الحيله يدل القـوم عاقلهـا

نصيحة واحدٍ جرّب وشاف من الزمان اهوال
يقدّم لك خلاصة هجـرةٍ جـرّب هوايلهـا

المصدر: منتدى الخليج

 كل الشكر ع الطرح الكلمات الجميله
ويعطيك الف عافية

 يسلمو قطعة سكر
على وضعك هذه الكلمات ويعطيك ألف عافية

 شكراً لطرحك الكلمات
يعطيك ربي العافية

 يعطيك العافيه

تسلم الايادي

 يسلمو على طرح المعلومات
ويعطيك ألف عافية

 منوريني "